மத்திய அரசின் வழிகாட்டு விதிமுறைகளின் படிதான் தியேட்டர்களில் 100% இருக்கைகளுக்கு அனுமதி அளிக்கமுடியும் என்று சுகாதாரத் துறை செயலாளர் ராதாகிருஷ்ணன் கூறினார்.
தமிழக சுகாதாரச் செயலாளர் ராதாகிருஷ்ணன் இன்று பத்திரிகையாளர்களிடம் பறவைக் காய்ச்சல், உருமாறிய கொரோனா மற்றும் கொரோனா தடுப்பூசி குறித்து பேசியபோது அவரிடம் தமிழக தியேட்டர்களில் 100% இருக்கைகளுக்கு அனுமதி அளித்தது குறித்து கேட்கப்பட்டது.
அதற்கு பதிலளித்த அவர், ’’வருவாய் மற்றும் பேரிடர் மேலாண்மை துறையிலிருந்து இதுகுறித்து அரசாணை வெளியிடப்பட்டிருக்கிறது. வருவாய்த் துறையிடம் இதுகுறித்து ஆலோசனை நடத்தப்படும். மக்கள் கூடும் அனைத்து இடங்களிலுமே SOP என்று சொல்லக்கூடிய நிலையான வழிகாட்டு நெறிமுறைகள் இருக்கிறது. அந்த வழிகாட்டு நெறிமுறைகளை அனைத்து துறையினருமே பின்பற்ற வேண்டும். அதை வைத்துதான் 100% இருக்கைகளுக்கு தியேட்டர்களில் அனுமதி வழங்கப்பட்டிருக்கிறது’’ என்று கூறினார்.
