FIFA WC 2026 | 16 மைதானங்களிலும் ஒரே தரம்.. அதிநவீன தொழில்நுட்பம் மூலம் மாற்றியமைப்பு!
உலகக் கோப்பை கால்பந்து போட்டிக்கு முன்னதாக, போட்டி நடைபெறும் விளையாட்டு மைதானங்களின் தரைத்தளங்களை அதிநவீனமாக மாற்றும் பணிகளில் தொழில்நுட்பக் குழுவினர் தீவிரமாக ஈடுபட்டுள்ளனர். வெவ்வேறு காலநிலை மற்றும் புவியியல் அமைப்புகளைக் கொண்ட மெக்சிகோ சிட்டி, வான்கூவர், மியாமி, சீட்டல் உள்ளிட்ட 16 உலகக் கோப்பை போட்டிகள் நடைபெற இருக்கும் மைதானங்களிலும் ஒரே மாதிரியான ஆடுகளங்களை உருவாக்குவதே இத்திட்டத்தின் நோக்கமாகும்.
மூடப்பட்ட மற்றும் பாதியாக மூடப்பட்ட மைதானங்களில் நிழலின் தாக்கத்தைச் சமாளிக்க 'க்ரோ லைட்ஸ்' (Grow Lights) எனப்படும் செயற்கை விளக்குகள் பயன்படுத்தப்பட உள்ளன. முறையான நீர் வடிகாலுக்காக மணல் சார்ந்த அடித்தளங்களும், ஆடுகளம் சேதமடைவதைத் தடுக்க கான்கிரீட்டில் உள்ள இரும்புக் கம்பிகளைப் போலச் செயல்படும் 'ஹைப்ரிட் ஃபைபர்களும்' (Hybrid Fibers) நிறுவப்பட்டு வருகின்றன.
இவற்றுடன், அதிக மழையின்போது உபரி நீரை அகற்றவும், மண்ணுக்குள் காற்றைச் செலுத்தவும் ஏதுவான 'வேக்யூம் வென்டிலேஷன்' தொழில்நுட்பமும் இதில் இடம்பெற்றுள்ளது. விளையாட்டு வீரர்கள் எங்கு விளையாடினாலும் ஒரே மாதிரியான தரைத்தளத்தை உணரலாம்.
