யாராவது ஒருத்தர் நின்னா போதும்: ’பஞ்சாப்’ அஸ்வின் பேட்டி

கடந்த சில போட்டிகளில் நாங்கள் வெற்றி பெறாததால் பதற்றம் இருந்தது என்று பஞ்சாப் அணியின் கேப்டன் ஆர்.அஸ்வின் கூறினார்.

ஐபிஎல் டி20 தொடரின் 38-வது லீக் போட்டியில், ராஜஸ்தான் ராயல்ஸ் - கிங்ஸ் லெவன் பஞ்சாப் அணிகள் நேற்று மோதின. டாஸ் வென்ற பஞ்சாப் அணி, பீல்டிங்கைத் தேர்வு செய்தது. அதன்படி ராஜஸ்தான் அணி, முதலில் பேட்டிங் செய்தது. அந்த அணி, நிர்ணயிக்கப்பட்ட 20 ஒவர்களில் 9 விக்கெட் இழப்புக்கு 152 ரன்கள் எடுத்தது. ஜோஸ் பட்லர், 39 பந்துகளில் 51 எடுத்தார். பஞ்சாப் தரப்பில் முஜிப்புர் ரகுமான் 3 விக்கெட்டையும் ஆண்ட்ரு டை 2 விக்கெட்டையும் வீழ்த்தினர். 

பின்னர் 153 ரன்கள் எடுத்தால் வெற்றி என்ற இலக்குடன் களமிறங்கிய பஞ்சாப் அணி, 18.4 ஓவர்களில் 4 விக்கெட் இழப்புக்கு 155 ரன்கள் எடுத்து வெற்றி பெற்றது. கே.எல்.ராகுல் 54 பந்துகளில் 3 சிக்சர், 7 பவுண்டரிகளுடன் 84 ரன்கள் குவித்தார். கருண் நாயர் 31 ரன்களும் ஸ்டோயினிஸ் 23 ரன்களும் எடுத்தனர். முஜிபுர் ரகுமான் ஆட்ட நாயகனாகத் தேர்ந்தெடுக்கப்பட்டார். 

போட்டிக்குப் பின் பேசிய பஞ்சாப் கேப்டன் அஸ்வின், ‘கடந்த சில போட்டிகளில் நாங்கள் வெற்றி பெறவில்லை. இதனால் புள்ளிப்பட்டியலில் முன்னேறவில்லை. பதற்றம் இருந்தது. இந்தப் போட்டியில் வெற்றி பெற்று முன்னேறி இருக்கிறோம். ஒரு பேட்ஸ்மேன் கடைசி வரை நின்றுவிட்டால் அது போதுமானது. எங்களின் கடந்த சில வெற்றி, பந்துவீச்சாளர்களால் கிடைத்தது. நான் கேப்டனாக திறந்த மனதுடன் வந்தேன். அணியை அடுத்தக்கட்டத்துக்கு அழைத்துச் செல்ல வேண்டும் என்று நினைத்தேன். அதன்படி செயல்பட்டுக் கொண்டிருக்கிறேன். கேப்டன் பொறுப்பு என்பது, பீல்டிங்கை அமைப்பது, பந்துவீச்சாளர்களை மாற்றுவது, சரியான பேட்டிங் ஆர்டரை திட்டமிடுவதுதான். டி20 போட்டிகளில், பந்துவீச்சாளர்கள்தான் தாக்கப்படுவார்கள். யாராவது ஒருவர் நின்று நன்றாக பேட்டிங் செய்தால், அணி அடுத்த சுற்றுக்கு செல்ல அது உதவும்’ என்றார்.

54 பந்துகளில் 84 ரன்கள் குவித்த கே.எல்.ராகுல் கூறும்போது, ‘அதிக நேரம் நின்று ரன்கள் குவித்தது மகிழ்ச்சியாக இருக்கிறது. அணியை வெற்றிபெற வைத்திருக்கிறேன். இந்த ஐபிஎல் தொடர் எனக்கு அதிக நம்பிக்கையை அளித்திருக்கிறது. அணி, அடுத்தக்கட்டத்துக்கு செல்ல இந்த வெற்றி முக்கியம் என்று நினைத்து அடித்து ஆடினேன். அதன்படியே நடந்தது. கடைசிவரை களத்தில் நின்றால் வெற்றி பெற்றுவிடலாம் என்பது தெரியும். என்னோடு இன்னொருவரும் நின்றால் நன்றாக இருக்கும் என நினைத்தேன். கருண் நாயர் அதை செய்தார். ஸ்டோயினிஸும் நன்றாக அடித்து ஆடினார். இந்தப் போட்டியில், பேட்டிங்கால் அணி வெற்றிபெற்றது மகிழ்ச்சி அளிக்கிறது’ என்றார்.