மெஸ்ஸியின் தந்தைக்கு என்ன ஆச்சு? வெற்றிப்பாதையில் வந்த புதிய சோதனை.. கவலையில் GOAT Messi!
2026 உலகக்கோப்பையில் அல்ஜீரியாவுக்கு எதிராக ஹாட்ரிக் அடித்து அர்ஜென்டினாவை 3-0 என வெற்றிப்பாதையில் நிறுத்திய மெஸ்சி, கோல் கொண்டாட்டத்தின் போது கண்ணீர் துடைத்த காட்சி உலகம் முழுவதும் பேசப்பட்டது. பின்னர் அவர், “இது கால்பந்துடன் சம்பந்தமில்லை, கடந்த நாட்கள் கடினமாக இருந்தன” என கூற, தந்தை ஜோர்ஜ் மெஸ்சி உடல்நலக்குறைவால் மருத்துவ கண்காணிப்பில் இருப்பது உறுதி செய்யப்பட்டது.
2026 FIFA உலகக்கோப்பையில் அர்ஜென்டினாவின் கனவு பயணம் வெற்றிகரமாக தொடங்கியுள்ள நிலையில், அந்த அணியின் கேப்டனும் உலக கால்பந்தாட்டத்தின் மிகப்பெரிய நட்சத்திரங்களில் ஒருவருமான Lionel Messi மைதானத்திற்கு வெளியே ஒரு கடினமான தனிப்பட்ட சூழ்நிலையை எதிர்கொண்டு வருகிறார். அல்ஜீரியாவுக்கு எதிரான உலகக்கோப்பை போட்டியில் ஹாட்ரிக் கோல்கள் அடித்து அர்ஜென்டினாவை வெற்றிப் பாதையில் அழைத்துச் சென்ற மெஸ்ஸி, கோல் அடித்த பிறகு கண்ணீர் துடைத்த காட்சி உலகம் முழுவதும் ரசிகர்களின் கவனத்தை ஈர்த்தது. ஆரம்பத்தில் அது மகிழ்ச்சியின் வெளிப்பாடு என்று கருதப்பட்டாலும், பின்னர் அதற்குப் பின்னால் குடும்பம் சார்ந்த வேதனையான காரணம் இருப்பது தெரியவந்துள்ளது.
அல்ஜீரியாவுக்கு எதிரான போட்டியில் அர்ஜென்டினா 3-0 என்ற கோல் கணக்கில் வெற்றி பெற்றது. அந்த போட்டியில் மூன்று கோல்களையும் அடித்து தனது உலகக்கோப்பை வரலாற்றில் மற்றொரு முக்கிய சாதனையை மெஸ்ஸி பதிவு செய்தார். ஆனால் முதல் கோலை அடித்த பிறகு அவர் ஜெர்சியால் கண்களை துடைத்துக் கொண்ட காட்சி சமூக வலைதளங்களில் வேகமாக பரவியது. பல ரசிகர்கள் அது சாதனை உணர்வால் ஏற்பட்ட கண்ணீர் என்று நினைத்தனர். இருப்பினும் போட்டிக்குப் பிறகு பேசிய மெஸ்ஸி, “அது கால்பந்துடன் தொடர்புடையது அல்ல. கடந்த சில நாட்கள் மிகவும் கடினமாக இருந்தன" என்று குறிப்பிட்டார்.
அதன் பின்னர் வெளியான தகவல்களின்படி, மெஸ்சியின் தந்தையும் நீண்டகால ஆலோசகருமான Jorge Messi உடல்நலப் பிரச்சினையால் மருத்துவ கண்காணிப்பில் இருப்பதாக குடும்பத்தினர் அதிகாரப்பூர்வ அறிக்கை வெளியிட்டுள்ளனர். அவரது உடல்நிலை குறித்து பல்வேறு வதந்திகள் சமூக வலைதளங்களில் பரவிய நிலையில், மெஸ்சி குடும்பம் நேரடியாக விளக்கம் அளிக்க வேண்டிய சூழ்நிலை உருவானது. குடும்பத்தின் அறிக்கையில், ஜோர்ஜ் மெஸ்சி மருத்துவ சிகிச்சை பெற்று வருவதாகவும், அவரது உடல்நிலையில் முன்னேற்றம் காணப்படுவதாகவும் தெரிவிக்கப்பட்டுள்ளது. அதே நேரத்தில் அவரது நோயின் தன்மை குறித்து எந்த விவரமும் வெளியிடப்படவில்லை.
மெஸ்சியின் வாழ்க்கையில் ஜோர்ஜ் மெஸ்சியின் பங்கு மிகவும் முக்கியமானது. சிறுவயதில் இருந்து மகனின் கால்பந்தாட்ட கனவை நனவாக்குவதற்காக தனது வேலையை விட்டுவிட்டு குடும்பத்துடன் ஸ்பெயினுக்கு குடிபெயர்ந்தவர் ஜோர்ஜ். மெஸ்சி FC Barcelona அணியில் சேர்வதிலிருந்து தொடங்கி, பின்னர் Paris Saint-Germain மற்றும் Inter Miami CF அணிகளுக்கு மாறிய வரலாற்றுச் முடிவுகளிலும் அவர் முக்கிய பங்கு வகித்துள்ளார். கால்பந்தாட்ட உலகில் மெஸ்சியின் வளர்ச்சிக்கு பின்னால் இருந்த முக்கிய நபர்களில் ஒருவராக ஜோர்ஜ் மெஸ்சி கருதப்படுகிறார்.
இந்த சூழ்நிலை மெஸ்சிக்கு மனரீதியாக பெரிய சவாலாக இருப்பதாக விளையாட்டு ஆய்வாளர்கள் கருதுகின்றனர். ஏற்கனவே 38 வயதில் தனது ஆறாவது உலகக்கோப்பையில் விளையாடும் அவர், அர்ஜென்டினாவின் உலகக்கோப்பை பட்டத்தை தக்க வைத்துக் கொள்ளும் முயற்சியில் முக்கிய பங்கு வகித்து வருகிறார். ஒரு பக்கம் நாட்டின் எதிர்பார்ப்புகள், மறுபக்கம் குடும்பத்தின் உடல்நலக் கவலைகள் என இரட்டை அழுத்தத்தை அவர் எதிர்கொண்டு வருகிறார். இருப்பினும் அல்ஜீரியாவுக்கு எதிரான அவரது ஹாட்ரிக் ஆட்டம், அவர் இன்னும் உலகின் சிறந்த வீரர்களில் ஒருவராக இருப்பதை மீண்டும் நிரூபித்துள்ளது.
