ஐபிஎல் 15-வது சீசன் போட்டிகள் மார்ச் முதல் மே வரை நடைபெறும் என பிசிசிஐ செயலாளர் ஜெய் ஷா தெரிவித்துள்ளார்.
இந்தியாவில் கொரோனா நோய் பரவல் அதிகரித்த காரணத்தால் ஐபிஎல் 13-வது தொடர் ஐக்கிய அரசு அமீரகத்தில் நடைபெற்றது. அதேபோல் 14-வது ஐபிஎல் தொடர் இந்தியாவில் நடைபெற்று வந்த நிலையில், கொரோனா தொற்று அதிகரித்ததால் பாதியில் நிறுத்தப்பட்டு எஞ்சிய போட்டிகள் ஐக்கிய அரசு அமீரகத்தில் நடைபெற்றது.
இந்நிலையில் இந்த ஆண்டு நடைபெற உள்ள 15-வது ஐபிஎல் தொடர் எங்கு எப்போது நடைபெறும் என்ற எதிர்பார்ப்பு ரசிகர்கள் மத்தியில் அதிக ஆர்வத்தை ஏற்படுத்திய நிலையில், பிசிசிஐ செயலாளர் ஜெய் ஷா அறிக்கை ஒன்றை வெளியிட்டுள்ளார்.
அதில், ஐபிஎல் 15-வது சீசன் மார்ச் கடைசி வாரத்தில் தொடங்கி மே இறுதி வரை நடைபெறும் என்பதை உறுதி செய்வதில் மகிழ்ச்சி அடைகிறேன். அதேபோல் ஐபிஎல் போட்டிகளை இந்தியாவிலேயே நடத்த பெரும்பாலான அணிகளின் உரிமையாளர்கள் விருப்பம் தெரிவித்துள்ளதாக பிசிசிஐ செயலாளர் ஜெய் ஷா தெரிவித்துள்ளார்.
