இன்று, 2-வது ஒரு நாள் போட்டி: மீண்டும் சாதிக்குமா விராத் டீம்?

இந்தியா - தென்னாப்பிரிக்க அணிகள் மோதும் இரண்டாவது ஒரு நாள் கிரிக்கெட் போட்டி செஞ்சூரியனில் இன்று நடக்கிறது. 

தென்னாப்பிரிக்கா சென்றுள்ள இந்திய கிரிக்கெட் அணி 6 போட்டிகள் கொண்ட ஒரு நாள் தொடரில் பங்கேற்றுள்ளது. டர்பனில் நடந்த முதலாவது ஆட்டத்தில் இந்தியா அபார வெற்றிபெற்றது. விராத் கோலி சதமடித்தார். ரஹானே 79 ரன்கள் குவித்து வெற்றிக்கு உதவினார். இந்த தொடரில் இந்திய அணி, 1-0 என்ற கணக்கில் முன்னிலை வகிக்கிறது. இந்த நிலையில் இவ்விரு அணிகள் இடையிலான 2-வது ஒரு நாள் போட்டி செஞ்சூரியனில் இன்று நடக்கிறது.

தென்னாப்பிரிக்க கேப்டன் டு பிளிசிஸ், காயம் காரணமாக விலகியதால், அவருக்கு பதிலாக 23 வயதான எய்டன் மார்க்ராம், கேப்டனாக நியமிக்கப்பட்டுள்ளார். இவர் இதுவரை வெறும் 2 ஒரு நாள் போட்டிகளில் மட்டுமே விளையாடி இருக்கிறார் என்பது குறிப்பிடத்தக்கது. 

ஏற்கனவே டிவில்லியர்ஸ் காயத்தால் விலகிய நிலையில் டுபிளிசும் வெளியேறி இருப்பது தென்னாப்பிரிக்காவுக்கு பின்னடைவை ஏற்படுத்தியுள்ளது. இது இந்திய அணிக்கு சாதகம்.  சுழற்பந்து வீச்சாளர்கள் குல்தீப் யாதவும், சேஹலும் இந்தப் போட்டியிலும் மிரட்டுவார்கள் என்று தெரிகிறது. செஞ்சுரியன் மைதானம் பேட்டிங்கிற்கு சாதகமாக இருக்கும் என்பதால் கடந்த போட்டியில் சாதித்த விராத் கோலியும் ரஹானேவும் இதிலும் சாதிப்பார்கள் என்று நம்மப்படுகிறது. இன்றையப் போட்டியில் இந்திய அணியில் மாற்றம் இருக்காது.

செஞ்சுரியன் ஆடுகளத்தில் இதுவரை 11 ஆட்டங்களில் விளையாடி 4-ல் வெற்றியும், 5-ல் தோல்வியும் கண்டுள்ளது இந்திய அணி. 2 ஆட்டத்தில் முடிவில்லை. 

போட்டி, இந்திய நேரப்படி பிற்பகல் 1.30 மணிக்கு தொடங்குகிறது.