FIFA 2026 | நெய்மரைத் தொடர்ந்து ரொனால்டோ.. முடிவுக்கு வந்த உலகக்கோப்பை பயணம்!
கனடா, மெக்ஸிகோ, அமெரிக்கா ஆகிய 3 நாடுகள் இணைந்து நடத்தும் FIFA கால்பந்து உலகக்கோப்பை தொடர், ஜூன் 11ஆம் தேதி தொடங்கி கோலாகலமாக நடைபெற்றுவருகிறது. இந்த நிலையில், போர்ச்சுகலின் 2026 ஃபிஃபா உலகக் கோப்பைப் பயணம் ஒரு கொடூரமான முறையில் முடிவுக்கு வந்தது. ஆம், உலகக்கோப்பையின் கால்பந்து தொடரின் ரவுண்ட் 16ஆவது ஆட்டம் ஒன்றில் போர்ச்சுகல் அணி, ஸ்பெயின் அணியிடம் 1-0 என்ற கணக்கில் தோல்வியடைந்து தொடரிலிருந்து வெளியேறியது.
இதைத் தொடார்ந்து, இருபது ஆண்டுகளுக்கும் மேலாக, போர்ச்சுகலை வழிநடத்திய ஜாம்பவான் கிறிஸ்டியானோ ரொனால்டோவின் உலகக்கோப்பை கனவு முடிவுக்கு வந்தது. 2006-ஆம் ஆண்டு உலகக் கோப்பை தொடரில் முதன்முதலில் விளையாடிய ரொனால்டோ, இந்த உலகக் கோப்பையே தனது கடைசி உலகக் கோப்பையாக இருக்கும் என்று போட்டிக்கு முன்னதாகவே அறிவித்திருந்தார்.
இந்தப் போட்டி நிறைவை குறிக்கும் இறுதி விசில் ஒலித்த பிறகு, போர்ச்சுகல் அணியின் நட்சத்திர வீரர் கண்ணீரை அடக்க முடியாமல் உணர்ச்சிவசப்பட்டார். போர்ச்சுகல் அணி வீரர்கள் சிலர் அவருக்கு ஆறுதல் கூறினர். உலகக்கோப்பைத் தொடர்களில் இருந்து முழுமையாக ஓய்வு பெற்றாலும், போர்ச்சுகல் தேசிய அணியில் இருந்து உடனடியாக விலகுவது குறித்து அவர் உறுதியான எந்த முடிவையும் அறிவிக்கவில்லை. தற்போது சவுதி அரேபியாவின் அல்-நாசர் (Al-Nassr) கிளப் அணிக்காக விளையாடி வரும் ரொனால்டோ, கிளப் போட்டிகளில் தொடர்ந்து விளையாடுவார் எனத் தெரிகிறது.
41 வயதான ரொனால்டோ, தொடர்ந்து 6 உலகக்கோப்பைத் தொடர்களில் (2006, 2010, 2014, 2018, 2022, 2026) விளையாடி, அனைத்திலும் கோல் அடித்த முதல் வீரர் என்ற வரலாற்றுச் சாதனையை அவர் படைத்துள்ளார். மேலும், போர்ச்சுகல் அணிக்காக இதுவரை 232 போட்டிகளில் விளையாடி, உலக சாதனையுடன் 146 சர்வதேச கோல்களை அடித்துள்ளார் என்பது குறிப்பிடத்தக்கது.
