பிளே-ஆஃப் நெருக்கடியில் களமிறங்கும் டெல்லி! ராஜஸ்தானை வீழ்த்துமா? டாஸ் வென்று பவுலிங்!

ஐ.பி.எல். கிரிக்கெட் தொடரில் இன்று நடைபெறும் ஆட்டத்தில் ராஜஸ்தான் ராயல்ஸ் - டெல்லி கேப்பிடல்ஸ் அணிகள் மோத உள்ளன. டாஸ் வென்ற டெல்லி கேப்பிடல்ஸ் கேப்டன் ரிஷப் பண்ட் பவுலிங்கை தேர்வு செய்தார்.

ஐ.பி.எல். கிரிக்கெட் தொடரில் இன்று நடைபெறும் ஆட்டத்தில் சஞ்சு சாம்சன் தலைமையிலான ராஜஸ்தான் ராயல்ஸ் அணியும் ரிஷப் பண்ட் தலைமையிலான டெல்லி கேப்பிடல்ஸ் அணியும் மோதுகின்றன. ராஜஸ்தான் அணி இந்த சீசனில் இதுவரை விளையாடிய 11 போட்டிகளில் 7 வெற்றி, 4 தோல்விகளுடன் 14 புள்ளிகள் பெற்று 3ஆம் இடத்தில் உள்ளது. நடப்புத் தொடரில் அதிக ரன்கள் குவித்த வீரர்களுக்கான ஆரஞ்சு தொப்பியும், அதிக விக்கெட்டுகளை வீழ்த்திய வீரர்களுக்கான ஊதா நிற தொப்பியும் ராஜஸ்தான் அணி வீரர்கள் வசம்தான் உள்ளது.

அந்த அணியில் பேட்டிங்கில் பட்டையை கிளப்பிவரும் ஜோஸ் பட்லர் இதுவரை பங்கேற்ற 11 போட்டிகளில் 3 அரை சதங்கள், 3 சதங்கள் உட்பட 618* ரன்களை 61.80 என்ற அபாரமான சராசரியுடன், இந்த சீசனில் அதிக ரன்கள் விளாசிய பேட்ஸ்மேன்களின் பட்டியலில் தொடர்ந்து முதலிடத்தில் தொடர்கிறார். அதேபோல் 11 ஆட்டங்களில் 22 விக்கெட்டுகளை வீழ்த்தி நடப்பு தொடரில் அதிக விக்கெட்டுகளை வீழ்த்திய வீரர்கள் பட்டியலில் யுஸ்வேந்திர சாஹல் முதலிடத்தில் உள்ளார். பேட்டிங், பவுலிங் என இரண்டிலுமே வலுவாக திகழும் ராஜஸ்தான் அணி இன்றைய ஆட்டத்தில் வென்று, பிளே-ஆஃப் சுற்றுக்கு முன்னேறுவதை உறுதி செய்ய முயற்சிக்கும்.

மறுபுறம், டெல்லி அணி இந்த சீசனில் இதுவரை ஆடிய 11 போட்டிகளில் 5 வெற்றி, 6 தோல்விகளுடன் 10 புள்ளிகள் பெற்று 5ஆம் இடத்தில் உள்ளது. அந்த அணி இன்றைய ஆட்டத்தில் வெற்றி பெற்றால் தான் பிளே-ஆஃப் வாய்ப்பில் நீடிக்க முடியும். டேவிட் வார்னர் (375 ரன்கள்), ரிஷப் பண்ட் (281 ரன்கள்), பிருத்வி ஷா (259 ரன்கள்) பேட்டிங்கில் கைகொடுக்கின்றனர். குல்தீப் யாதவ் (18 விக்கெட்டுகள்), கலீல் அகமது (16 விக்கெட்டுகள்) பவுலிங்கில் பலம் சேர்க்கின்றனர். டெல்லி அணி கடந்த ஆட்டத்தில் சென்னையிடம் படுதோல்வியை தழுவியது. லலித் யாதவுக்கு பதிலாக ரிபால் படேலை பயன்படுத்தியது தோல்விக்கு காரணமாக விமர்சிக்கப்பட்டது.

இந்நிலையில் டெல்லி அணியில் இரண்டு மாற்றங்கள் செய்யப்பட்டுள்ளன. ரிபால் படேலுக்குப் பதிலாக மீண்டும் லலித் யாதவும், கலீல் அகமதுவுக்குப் பதிலாக சேத்தன் சகாரியாவும் களமிறங்க உள்ளனர். ராஜஸ்தான் அணியில் தன் குழந்தை பிறந்ததற்காக தாயகம் சென்றுள்ள ஹெட்மேயருக்கு பதிலாக ரஸ்ஸி வான் டெர் டுசென் களமிறங்குகிறார். பிளே ஆஃப் வாய்ப்பில் நீடிக்க முழு உத்வேகத்துடன் களமிறங்க்க உள்ள டெல்லி கேப்பிடல்ஸ் அணி டாஸ் வென்று பவுலிங் தேர்வு செய்துள்ளது.

இரு அணிகளின் ஆடும் லெவன்:

ராஜஸ்தான் ராயல்ஸ்: யஷஸ்வி ஜெய்ஸ்வால், ஜோஸ் பட்லர், சஞ்சு சாம்சன் (கேப்டன் & விக்கெட் கீப்பர்), தேவ்தத் படிக்கல், ரஸ்ஸி வான் டெர் டுசென், ரியான் பராக், ரவிச்சந்திரன் அஷ்வின், டிரென்ட் போல்ட், பிரசித் கிருஷ்ணா, யுஸ்வேந்திர சாஹல், குல்தீப் சென்

டெல்லி கேப்பிடல்ஸ் : டேவிட் வார்னர், ஸ்ரீகர் பாரத், மிட்செல் மார்ஷ், ரிஷப் பந்த் (கேப்டன் & விக்கெட் கீப்பர்), லலித் யாதவ், ரோவ்மன் பவல், அக்சர் படேல், ஷர்துல் தாக்கூர், சேத்தன் சகாரியா, குல்தீப் யாதவ், அன்ரிச் நார்ட்ஜே