'எல்லாத்தையும் கொடுத்துட்டேன்..’ முடிவுக்கு வந்த கேப்டன் பயணம்.. விலகிய ஹர்மன்பிரீத் உணர்ச்சி பதிவு!

இந்திய மகளின் அணி கேப்டன் ஹர்மன்பிரீத் கவுர், தனது பதவியிலிருந்து விலகியுள்ளார். ஜப்பானில் சமீபத்தில் நடைபெற்ற ஆசிய விளையாட்டுப் போட்டிகளில் இந்தியா தங்கப் பதக்கம் வெல்ல உதவியதைத் தொடர்ந்து, ஹர்மன்பிரீத் அப்பொறுப்பிலிருந்து விடைபெற்றார். இந்த முடிவின்படி, ஹர்மன்பிரீத் இந்திய அணிக்காக அனைத்து வகையான கிரிக்கெட் போட்டிகளிலும் கேப்டன் பொறுப்பிலிருந்து விலகுகிறார். கவுகாத்தியில் ஹர்மன்பிரீத், துணை கேப்டன் ஸ்மிருதி மந்தனா, தலைமைப் பயிற்சியாளர் அமோல் மஜும்தார் மற்றும் பிசிசிஐ செயலாளர் தேவாஜித் சாய்கியாவுடன் கலந்துபேசிய பிறகே இந்த கேப்டன் பதவி மாற்றம் நிகழ்ந்துள்ளது.

இதுதொடர்பாக, ஹர்மன்பிரீத் வெளியிட்டுள்ள இன்ஸ்டா பதிவில், ‘இன்று, அனைத்து வடிவங்களிலுமான இந்திய மகளிர் கிரிக்கெட் அணியின் கேப்டன் பதவியிலிருந்து நான் விலகுகிறேன். இது ஒரு எளிதான முடிவு அல்ல. இதில் பல வருட நினைவுகளும், உணர்ச்சிகளும், தியாகங்களும், என் வாழ்நாள் முழுவதும் என்னுடன் நிலைத்திருக்கும் தருணங்களும் அடங்கியுள்ளன. இந்த அணிக்கும் இந்திய மகளிர் கிரிக்கெட்டுக்கும் என்னிடம் இருந்த அனைத்தையும் நான் கொடுத்திருக்கிறேன். என் இரத்தம், என் வியர்வை, என் நேரம், பல சமயங்களில் என் ஆட்டத்தின் ஒரு பகுதி மற்றும் தனிப்பட்ட லட்சியங்கள்கூட. அணிக்குத்தான் முதலிடம் கொடுக்க வேண்டும் என்று நான் நம்பியதால், எனது தனிப்பட்ட செயல்பாடு, என் சொந்த வளர்ச்சி மற்றும் எனக்காக நான் விரும்பியவை ஆகியவற்றை ஒதுக்கிவைக்க வேண்டிய தருணங்களும் இருந்தன. ஒரு கேப்டனாக, நான் கடினமான முடிவுகளை எடுக்க வேண்டியிருந்தது. அந்த முடிவுகள் எப்போதும் புரிந்துகொள்ளக்கூடியவையாகவும், எளிதானவையாகவும் இருக்கவில்லை; சில சமயங்களில் தனிப்பட்ட இழப்புகளையும் ஏற்படுத்தின" எனப் பதிவிட்டுள்ளார்.

மேலும் அதில், “ஆனால், நான் எடுத்த ஒவ்வொரு முடிவும் ஒரே ஒரு நோக்கத்துடன்தான் இருந்தது. இந்த அணியை மேம்படுத்துவதும், மற்ற வீரர்களுக்கு வளரவும், தங்களைத் தாங்களே நம்பவும், தங்களின் மிகச்சிறந்த வடிவமாக மாறவும் வாய்ப்பளிப்பதுமே அது. நான் எல்லாவற்றையும் பார்த்திருக்கிறேன். மிகத் தாழ்ந்த தருணங்களையும், மனவேதனையையும், விமர்சனங்களையும், சந்தேகங்களையும், எதுவுமே நமக்குச் சாதகமாக அமையாத நாட்களையும் நான் கண்டிருக்கிறேன். அதுமட்டுமல்லாமல், வெற்றிகள், கொண்டாட்டங்கள், நம் நாட்டைப் பிரதிநிதித்துவப்படுத்திய பெருமிதம், ஒவ்வொரு தியாகத்தையும் அர்த்தமுள்ளதாக்கிய தருணங்கள் என மிக உயர்ந்த உச்சங்களையும் நான் அனுபவித்திருக்கிறேன். இன்று நான் கேப்டன் பதவியிலிருந்து உணர்ச்சிகள் நிறைந்த இதயத்துடனும், அதேசமயம் மன அமைதியுடனும் விடைபெறுகிறேன். ஏனென்றால், என் அணி ஒரு நல்ல நிலையில் இருப்பதாக நான் உண்மையாகவே நம்புகிறேன். திறமை, குணம், நம்பிக்கை மற்றும் ஒரு எதிர்காலத்தைக் கொண்ட அந்த அணியின் ஒரு பகுதியாக இருப்பதையும், அதைக் காண்பதையும் நான் மிகுந்த உற்சாகத்துடன் எதிர்நோக்குகிறேன்.

நான் எனது கடமையைச் செய்துவிட்டதாக உணர்கிறேன். இந்த அணிக்கு என்னிடம் இருந்த அனைத்தையும் கொடுத்தேன். அந்தப் பொறுப்பை நான் பெருமையுடன் சுமந்தேன், மேலும் இந்திய மகளிர் கிரிக்கெட்டை வழிநடத்தும் பாக்கியத்திற்காக நான் என்றென்றும் நன்றியுடன் இருப்பேன். இனி நான் ஒரு புதிய அத்தியாயத்தைத் தொடங்க வேண்டிய நேரம் வந்துவிட்டது. கேப்டன் பதவி இன்றுடன் முடிவடையலாம், ஆனால் இந்திய கிரிக்கெட் மீதான என் அன்பு ஒருபோதும் முடிவடையாது. இரத்தம். வியர்வை. தியாகம். பெருமை. அனைத்தையும் கொடுத்தேன். இப்போது, ​​விளையாட்டின் மீதான காதலுக்காக மீண்டும் விளையாட நான் தயாராக இருக்கிறேன். கேப்டன் பதவி முடிவடைகிறது. பயணம் தொடர்கிறது" என அதில் பதிவிட்டுள்ளார்.

37 வயதான ஹர்மன் பிரீத் கவுர், 2012-இல் தற்காலிக அடிப்படையில் கேப்டன் பொறுப்பை ஏற்று, இந்தியா மகளிர் டி20ஐ ஆசியக் கோப்பையை வெல்ல உதவினார். பின்னர் 2016-இல் முழுநேர கேப்டனாகப் பொறுப்பேற்றார். இந்த 10 ஆண்டுகால அவருடைய கேப்டன் பதவிக்காலத்தில் இந்திய பல்வேறு வெற்றிகளைப் பெற்றிருக்கிறது. மகளிர் டி20 போட்டிகளில் கேப்டனாக, அவர் அதிக வெற்றிகளைத் தேடிக் கொடுத்துள்ளார். அவர் அணியை வழிநடத்திய 155 போட்டிகளில் 92 போட்டிகளில் வெற்றி பெற்றுள்ளார். அதுபோல் 51 ஒருநாள் போட்டிகளில் 30 போட்டிகளில் வெற்றி வாகையைத் தந்துள்ளார். அவர் கேப்டனாக இருந்த காலத்தில், இந்தியா 3 ஆசியக் கோப்பைகளையும், ஒரு 2025 உலகக் கோப்பையையும், ஆசிய விளையாட்டுப் போட்டிகளில் இரண்டு தங்கப் பதக்கங்களையும், காமன்வெல்த் விளையாட்டுப் போட்டிகளில் வெள்ளிப் பதக்கத்தையும் வென்று சாதனை படைத்தது. மகளிர் பிரீமியர் லீக் (WPL) தொடரில் மும்பை இந்தியன்ஸ் அணி சாம்பியன் பட்டத்தை வெல்வதற்கும் வழிகாட்டினார்.

ஹர்மன்பிரீத் கவுர் பதவி விலகியதைத் தொடர்ந்து, மூன்று வடிவப் போட்டிகளுக்கும் துணை கேப்டன் ஸ்மிருதி மந்தனா அணியின் புதிய கேப்டனாக நியமிக்கப்படலாம் என நம்பப்படுகிறது. இதுகுறித்த முடிவு விரைவில் எடுக்கப்படும் என எதிர்பார்க்கப்படுகிறது.