IND v SA | கடைசி ஓவர் வரை திக்.. திக்.. Ro-Ko அதிரடிக்கு SA பதிலடி.. போராடி வெற்றிபெற்ற இந்திய அணி!
தென்னாப்பிரிக்காவிற்கு எதிரான முதல் ஒருநாள் போட்டியில் இந்திய அணி த்ரில் வெற்றி பெற்றது. இதன்மூலம் 1-0 என்ற கணக்கில் முன்னிலையில் உள்ளது.
இந்தியாவில் சுற்றுப்பயணம் மேற்கொண்டிருக்கும் தென்னாப்பிரிக்கா அணி, கிரிக்கெட் தொடர்களில் பங்கேற்று விளையாடி வருகிறது. அதன்படி, 2 டெஸ்ட் போட்டிகளைக் கொண்ட தொடரைக் கைப்பற்றிய அந்த அணி, அடுத்து 3 ஒருநாள் போட்டிகளில் விளையாடி வருகிறது. அதன்படி இந்திய - தென்னாப்பிரிக்க அணிகளுக்கு இடையிலான முதல் ஒருநாள் போட்டி இன்று ராஞ்சியில் தொடங்கியது. இதில் முதலில் பேட் செய்த இந்திய அணி நிர்ணயிக்கப்பட்ட 50 ஓவர்களில் 8 விக்கெட் இழப்புக்கு 349 ரன்கள் எடுத்தது. இன்றைய போட்டியில் டெஸ்ட் மற்றும் டி20யில் ஓய்வுபெற்ற அனுபவ வீரர்களான ரோகித் சர்மாவும், விராட் கோலியும் பழைய ஆட்டத்தை ரசிகர்களுக்கு கண்முன் நிறுத்தினர். அது, இளம்வீரர்களுக்கு ஒரு பாடகமாகவும் உத்வேகமாகவும் இருந்திருக்கும் என்றே கிரிக்கெட் வல்லுநர்கள் தெரிவிக்கின்றனர். இதனால், ஏன் அவர்கள் டெஸ்ட் போட்டிகளில் இருந்து ஓய்வு பெற்றனர் என்கிற கேள்வியும் எழுகிறது.
இது ஒரு தனிக்கதையாக இருந்தாலும், இன்றைய போட்டியில் அவர்கள் இருவரும் ஏதுவான பந்துகளைப் பவுண்டரிக்கு விரட்டி ரசிகர்களுக்கு விருந்தளித்தனர். ஒருகட்டத்தில் அதிரடியாக ஆடிய ரோகித் சர்மா, 5 பவுண்டரி, 3 சிக்ஸருடன் 51 பந்துகளில் 57 ரன்கள் எடுத்து ஆட்டமிழந்தார். இதன்மூலம் ஒருநாள் போட்டிகளில் அதிகம் சிக்ஸர் (352) அடித்த வீரர்களின் பட்டியலில் முதல் இடத்தைப் பிடித்தார்.
மறுபுறம், அவருடன் தொடக்கம் முதலே அதிரடி காட்டி வந்த விராட் கோலி, சதம் அடித்து தம்மீது இருந்த முழுமையான விமர்சனத்தைப் போக்கினார். கடந்த காலங்களில் மிடில் ஓவர்களில் வேகம் குறைவதற்காக அடிக்கடி விமர்சிக்கப்பட்ட கோலி, இந்த முறை அப்படி ஒரு தளர்வு ஏற்படாமல் பார்த்துக் கொண்டார். மேலும், வழக்கமான பவுண்டரிகளுடன் ஸ்கோர்போர்டையும் உயர்த்தினார். அவர் ஒருநாள் போட்டிகளில் 52வது சதத்தைப் பதிவு செய்தார்.
கிட்டத்தட்ட 43 ஓவர்கள்வரை களத்தில் நின்ற விராட் கோலி, 120 பந்துகளில் 135 ரன்கள் எடுத்து ஆட்டமிழந்தார். அதில் 11 பவுண்டரிகளும், 7 சிக்ஸர்களும் அடக்கம். கடைசி நேரத்தில் கேப்டன் கே.எல்.ராகுல் மற்றும் ரவீந்திர ஜடேஜாவின் அதிரடியால் இந்திய அணி நிர்ணயிக்கப்பட்ட 50 ஓவர்களில் 8 விக்கெட் இழப்புக்கு 349 ரன்கள் எடுத்தது. கே.எல்.ராகுல் 60 ரன்களிலும், ஜடேஜா 32 ரன்களிலும் ஆட்டமிழந்தனர்.
பின்னர், 350 ரன்கள் எடுத்தால் வெற்றி என்ற இலக்குடன் களமிறங்கிய தென்னாப்பிரிக்கா அணி, 11 ரன்களுக்குள் 3 விக்கெட்களை இழந்து தொடக்கத்திலேயே சரிவைச் சந்தித்தது. ஆனால், மேத்யூ பிரிடிஷ்க்கும் டோனி டி ஜோர்ஜியும் இணைந்து மேலும் விக்கெட் விழாமல் பார்த்துக் கொண்டதுடன், ரன் சேகரிப்பிலும் ஈடுபட்டனர். ஒருகட்டத்தில் மேத்யூ 72 ரன்களில் வெளியேற, டோனி 39 ரன்களில் நடையைக் கட்டினார். ஆனாலும் அதற்குப் பிறகு வந்த பிரிவிஸும் ஜேன்சனும் அணியை மேலும் வலுவாக்கும் நிலைக்கு இழுத்துச் சென்றனர். அதிலும் ஜேன்சன் ஒருநாள் போட்டியையே டி20 போட்டியாக மாற்றிக் காட்டினார். அவர் களத்தில் இருக்கும்வரை இந்தியாவுக்கு புளியைக் கரைத்துக் கொண்டே இருந்தது. இறுதியில் அவர் 39 பந்துகளில் 8 பவுண்டரி, 3 சிக்ஸருடன் 70 ரன்களில் ஆட்டமிழந்தார்.
ஆனாலும் அவருக்குப் பின் களமிறங்கிய கார்பின் போச் சும்மா இருக்கவில்லை. கடைசிவரை இந்திய அணிக்கு கலக்கத்தை ஏற்படுத்தினார். கடைசி ஓவரில் 18 ரன்கள் தேவைப்பட்ட நிலையில், 2வது பந்தை எதிர்கொண்ட போச், அதை சிக்ஸருக்கு தூக்க முயன்றார். ஆனால், ரோகித் சர்மாவின் கைகளில் தஞ்சமடைந்தது. அவர் 51 பந்துகளில் 67 ரன்கள் எடுத்தார். இதையடுத்து, தென்னாப்பிரிக்காவின் வெற்றிப் பாதை முடிவுக்கு வந்தது. இறுதிவரை இந்திய அணியை மிரட்டிப் பார்த்த தென்னாப்பிரிக்க அணி, 49.2 ஓவரில் 332 ரன்களுக்கு ஆட்டமிழந்தது. இதையடுத்து இந்தியா 17 ரன்கள் வித்தியாசத்தில் த்ரில் வெற்றி பெற்றது. இந்திய அணி தரப்பில் குல்தீப் யாதவ் 4 விக்கெட்களையும், ஹர்சித் ரானா 3 விக்கெட்களையும் கைப்பற்றினர். 3 போட்டிகளில் கொண்ட இந்த தொடரில் இந்திய அணி 1-0 என்ற கணக்கில் முன்னிலை பெற்றுள்ளது. இவ்விரு அணிகளுக்கான 2வது ஒருநாள் போட்டி ராய்ப்பூரில் டிசம்பர் 3ஆம் தேதி நடைபெற இருக்கிறது.
