களத்தில் இறங்குவாரா BHUVI?? எதிர்பார்ப்புகளை எகிறச் செய்யும் அறிவிப்பு

இந்தியா - மேற்கிந்தியத் தீவுகள் அணிகளுக்கு இடையிலான ஐந்தாவது மற்றும் கடைசி டி20 போட்டி, வரும் சனிக்கிழமை (அக்டோபர் 17) பெங்களூருவில் உள்ள எம். சின்னசாமி மைதானத்தில் நடைபெறவுள்ளது. ஹைதராபாத்தில் நடைபெற்ற நான்காவது டி20 போட்டியின்போது அர்ஷ்தீப் சிங்கின் தோள்பட்டையில் காயம் ஏற்பட்டது. அந்தப் போட்டியில் மேற்கிந்தியத் தீவுகள் அணி வெற்றி பெற்றதால், தொடர் 2-2 என சமநிலையை எட்டியது.

இதனால் இறுதிப்போட்டி மிகவும் முக்கியத்துவம் வாய்ந்த போட்டியாக இருக்கிறது. இதற்கிடையில்தான் ஐந்தாவது போட்டிக்கான இந்திய அணியில் புவனேஷ்வர் குமார் சேர்க்கப்பட்டுள்ளார். இருப்பினும், கடைசிப் போட்டியில் அவர் விளையாடுவாரா என்பது குறித்து, அவரது உடல்நிலை மற்றும் காயத்திலிருந்து அவர் மீண்டு வரும் நிலையைப் பொறுத்து போட்டிக்கு முன்பாக முடிவு செய்யப்படும் என்றும் எதிர்பார்க்கப்படுகிறது.

இதுவரை இந்தத் தொடரில் இந்திய அணியின் பந்துவீச்சாளர்கள் எதிரணியின் ரன் எடுக்கும் வேகத்தைக் கட்டுப்படுத்துவதில் திணறியிருக்கின்றனர் என்பது மிக முக்கியமான விஷயமாகப் பார்க்கப்படுகிறது. ஏனெனில், அர்ஷ்தீப் மற்றும் அக்சர் இருவரும் சிறப்பாகச் செயல்பட்டிருந்தாலும், பேட்டிங்கிற்கு சாதகமான ஆடுகளங்கள் என்பதால் அவர்களது முழுத்திறனும் முழுமையாக வெளிப்படவில்லை. பிரின்ஸ் யாதவ், மயங்க் யாதவ், நமன் தீர் மற்றும் நிதிஷ் குமார் ரெட்டி போன்றோராலும் மேற்கிந்திய தீவுகள் அணியின் பேட்ஸ்மேன்களைக் கட்டுப்படுத்த முடியவில்லை.

இத்தகைய சூழலில்தான் புவனேஷ்வர் குமார் இந்திய அணியில் இடம்பெறுவது முக்கியத்துவம் பெறுகிறது. ஏனெனில், போட்டி நடக்கக்கூடிய பெங்களூர் சின்னச்சாமி மைதானம் பேட்ஸ்மேன்களுக்குச் சாதகமான மைதானமாக இருந்தாலும், ஆர்சிபி அணிக்காக இம்மண்ணில் விளையாடிய அனுபவம் புவனேஷ்வர் குமாருக்கு இருக்கிறது. இந்த மைதானத்த்தில் பவர்பிளே மற்றும் டெத் ஓவர்களில் பந்துவீசுவது சவாலானது என்றாலும் புவனேஷ்வர் குமாரின் ஸ்விங் மற்றும் யாக்கர் வீசும் திறன் இங்கு கைகொடுக்கும் என்றும் எதிர்பார்க்கப்படுகிறது. மேலும், புவனேஷ்வர் குமாருக்கும் இந்த போட்டி முக்கியமானதாக இருக்கும். ஏனெனில், அக்டோபர் 22-ம் தேதி கிறைஸ்ட்சர்ச்சில் தொடங்கவுள்ள நியூசிலாந்து அணிக்கு எதிரான டி20 தொடருக்கான இந்திய அணியிலும் புவனேஷ்வர் குமார் ஏற்கெனவே தேர்வு செய்யப்பட்டுள்ளார்.

36 வயதான புவனேஷ்வர் குமார் 21 டெஸ்ட் போட்டிகளிலும், 121 ஒருநாள் போட்டிகளிலும் விளையாடி இருக்கிறார். மேலும் 87 சர்வதேச டி20 போட்டிகளில் விளையாடி இருக்கும் புவனேஷ்வர் குமார் 90 விக்கெட்களையும் கைப்பற்றி இருக்கிறார். கடந்த ஐபிஎல் சீசனில் 17 விக்கெட்டுகளைக் கைப்பற்றி, ராயல் சேலஞ்சர்ஸ் பெங்களூரு அணி தொடர்ந்து இரண்டு முறை ஐபிஎல் கோப்பையை வெல்வதில் முக்கியப் பங்காற்றினார் என்பதும் குறிப்பிடத்தக்கது.