ஆசிய கோப்பை|வங்காள தேசம் - ஆப்கானிஸ்தான்., சூப்பர் ஃபோர் சுற்றுக்கு முன்னேறப்போவது யார்?
ஆசிய கோப்பை தொடரின் பி பிரிவில் ஆப்கானிஸ்தான் மற்றும் வங்கதேச அணிகளுக்கு இடையிலான போட்டி மிகுந்த எதிர்பார்ப்பை ஏற்படுத்தியுள்ளது.
துபாய் மற்றும் அபுதாபியில் நடைபெற்று வரும் 17-வது ஆசிய கோப்பை தொடரில், சூப்பர் ஃபோர் சுற்றுக்கு முன்னேறப்போவது யார் என்ற கட்டம் வந்துவிட்டது. ஹாங்காங்கிற்கு எதிராக 94 ரன்கள் வித்தியாசத்தில் அபார வெற்றி பெற்று நம்பிக்கையுடன் இருக்கிறது ஆப்கானிஸ்தான் அணி. இலங்கையிடம் படுதோல்வி கண்ட பங்களாதேஷ் மீண்டெழும் முயற்சியுடன் களம் காண்கிறது.
ஹாங்காங்கிற்கு எதிரான போட்டியில் ஆப்கானிஸ்தான் அனைத்து துறைகளிலும் சிறந்து விளங்கியது. குறிப்பாக, ஆல்ரவுண்டர் அஸ்மத்துல்லா ஓமர்சாய் 21 பந்துகளில் 53 ரன்கள் குவித்து, ஆப்கானிஸ்தானுக்காக அதிவேக டி20 அரைசதம் அடித்த வீரர் என்ற சாதனையை படைத்தார். மேலும், ஆப்கானிஸ்தானின் பலம் வாய்ந்த சுழற்பந்துவீச்சு தாக்குதல், வங்கதேச பேட்ஸ்மேன்களுக்கு பெரும் சவாலாக இருக்கும். ரஷீத் கான், நூர் அகமது, மற்றும் முகமது நபி போன்ற சுழற்பந்து வீச்சாளர்கள், வங்கதேசத்தின் பலவீனமான பேட்டிங்கை எளிதில் சமாளிப்பார்கள் என எதிர்பார்க்கப்படுகிறது.
மறுபுறம், வங்கதேச அணி இலங்கைக்கு எதிரான முதல் போட்டியில் மிகவும் மோசமாக விளையாடியது. பேட்டிங் மற்றும் பந்துவீச்சு என இரண்டு துறைகளிலும் அந்த அணி தடுமாறியது. ஷமிம் ஹொசைன் மற்றும் ஜாகர் அலி ஆகியோர் மட்டுமே சற்று சிறப்பாக செயல்பட்டனர். இவர்களுக்கு மற்ற வீரர்களின் ஆதரவு இல்லாததால் அணி தோல்வியைத் தழுவியது. மேலும், அணியின் முக்கிய வேகப்பந்து வீச்சாளரான தஸ்கின் அகமது விளையாடாதது அணியின் பலவீனத்தை அதிகரித்தது. இந்த போட்டியில் தஸ்கின் மீண்டும் அணியில் இணைவார் என எதிர்பார்க்கப்படுகிறது.
மொத்தத்தில், இந்த போட்டி பங்களாதேஷ் அணிக்கு வாழ்வா சாவா போட்டியாக உள்ளது. அவர்கள் தங்களது பலவீனங்களை சரிசெய்து, ஆப்கானிஸ்தானுக்கு எதிராக ஒரு வலுவான ஆட்டத்தை வெளிப்படுத்த வேண்டும். இல்லையெனில், அவர்களின் ஆசிய கோப்பை கனவு விரைவில் முடிவுக்கு வரக்கூடும். அபுதாபியில் நடைபெறும் ஆப்கானிஸ்தான் மற்றும் வங்காள தேசம் இடையிலான இன்றைய போட்டி இன்று இரவு 8 மணிக்கு தொடங்குகிறது.
