துபாய் 24H கார் ரேஸில் 3வது இடம்.. துள்ளிக்குதித்த அஜித்..!

விடாமுயற்சி, குட் பேட் அக்லி முதலிய இரண்டு திரைப்படங்களில் ஒரே நேரத்தில் நடித்து முடித்த நடிகர் அஜித்குமார், படப்பிடிப்பு வேலைகளை முடித்தபிறகு துபாயில் நடக்கும் கார் பந்தயத்தில் கலந்துகொள்ள புறப்பட்டுச்சென்றார்.

சமீபத்தில் ’அஜித்குமார் ரேஸிங்’ என்ற கார் ரேஸிங் அணியை உருவாக்கிய நடிகர் அஜித்குமார், தன்னுடைய அணியுடன் சேர்ந்து அடுத்தடுத்து நடக்கவிருக்கும் கார் பந்தயங்களில் அடுத்த 9 மாதங்களுக்கு பங்கேற்கவிருப்பதாக தெரிவித்துள்ளார்.

துபாயில் நடைபெற்றுவரும் 24H கார் ரேஸில் அஜித்குமார் அணியுடன் கலந்துகொண்ட அஜித்குமார் பேசுகையில், கார் பந்தயங்கள் நடைபெறும் காலங்களில் படங்களில் நடிக்கப்போவதில்லை என்றும், ரேஸ் இல்லாத அக்டோபர்-மார்ச் இடையேயான காலகட்டத்தில் படத்தில் நடிக்கப்போவதாகவும் தெரிவித்திருந்தார்.

இந்நிலையில் தகுதிச்சுற்றில் 7வது இடத்தை பிடித்து அடுத்த சுற்றுக்கு முன்னேறிய அஜித்குமார் ரேஸிங் அணி, துபாயில் நடைபெற்ற 992 பிரிவு கார் பந்தயத்தில் 3வது இடத்தை பிடித்து அசத்தியுள்ளது. அந்த வெற்றியை அணியுடன் சேர்ந்து அஜித்குமார் துள்ளிக்குதித்து கொண்டாடினார்.

அஜித்குமார் ரேஸிங் அணியால் நேற்று அதிகாரப்பூர்வமாக அறிவிக்கப்பட்டதில், அஜித்குமார் குறிப்பிட்ட ரேஸில் மட்டுமே கலந்துகொள்வார் என்று கூறப்பட்டது. அதுமட்டுமில்லாமல் அஜித்குமார் அணி போர்ஷே 992 கப் கார் (எண் 901) ரேஸ், போர்ஷே கேமன் GT4 (எண் 414) ரேஸ் என இரண்டு பிரிவுகளில் பங்கேற்பதாக தெரிவிக்கப்பட்டது. இதில் GT4 ரேஸில் மட்டும் அஜித் பங்கேற்பார் எனவும் கூறப்பட்டது.

இந்நிலையில் இரண்டு ரேஸின் முடிவில் அஜித்குமார் அணியானது சர்வதேச அளவில் போர்ஷே 992 கப் கார் ரேஸ் பிரிவில் 3வது பிடித்தை பிடித்து அசத்தியது. முதல்முறையாக ஒரு சர்வதேச ரேஸில் பங்கேற்ற அஜித்குமார் அணி, முதல் பங்கேற்பிலேயே 3வது இடத்தை பிடித்தது பெரிய மகிழ்ச்சியை அணிக்குள் ஏற்படுத்தியது. இதைப்பார்த்த அஜித்குமார் தன்னுடைய அணியுடன் துள்ளிக்குதித்து கொண்டாடினார்.

அதுமட்டுமில்லாமல் தேசியக்கொடியுடன் உற்சாகத்துடன் வெளியில் ஓடிவந்த அஜித்குமார், இந்திய தேசியக்கொடியை கையில் ஏந்திய படி ரசிகர்களிடம் மகிழ்ச்சியை பகிர்ந்துகொண்டார். GT4 பிரிவில் அஜித் தன்னுடைய சிறந்த பங்களிப்பை அளித்ததாகவும், பிரேக் ஃபெய்லியரால் ஏற்பட்ட விபத்திற்கு பிறகு அவர் சிறப்பாக செயல்பட்டதாகவும் அஜித்குமார் ரேஸிங் அணி தெரிவித்துள்ளது. 992 பிரிவில் 3வது இடம்பிடித்த அஜித்குமார் ரேஸிங் அணி, ஒட்டுமொத்தமாக 23வது இடத்தை பிடித்துள்ளது.

நடிகர் மாதவன் நேரடியாக சென்று அஜித்குமாருக்கு உற்சாகமளித்த புகைப்படமும் வைரலாகி வருகிறது. கார் பந்தயத்தில் முதல் முயற்சியிலேயே உச்சம் தொட்ட நடிகர் அஜித்குமார் மற்றும் அவருடைய அணிக்கு ரசிகர்கள் வாழ்த்துகளை பகிர்ந்து வருகின்றனர்.