பிட் அடிக்க விடாமல் கெடுபிடி... உ.பி. பள்ளிகளில் குறைந்தது தேர்ச்சி

உத்தரப் பிரதேசத்தில் 10 மற்றும் 12-ஆம் வகுப்பு பொதுத்தேர்வு முடிவுகள் வெளியான நிலையில் 165 பள்ளிகளில் எந்தவொரு மாணவ- மாணவியரும் தேர்ச்சி பெறவில்லை எனத் தெரியவந்துள்ளது.

உத்தரப் பிரதேசத்தில் நடந்து முடிந்த 10 மற்றும் 12-ஆம் வகுப்பு பொதுதேர்வு முடிவுகள் வெளியாகி உள்ளன. இதில் மிகவும் அதிர்ச்சி தரும் விஷயமாக 165 பள்ளிகளில் எந்தவொரு மாணவ- மாணவியரும் தேர்ச்சி பெறவில்லை என்பது தெரியவந்துள்ளது. இதுமட்டுமில்லாமல் 385 பள்ளிகளில் 20 சதவீதத்திற்கும் குறைவான மாணவ- மாணவியர் மட்டுமே தேர்ச்சி பெற்றுள்ளனர். இதற்கு முந்தைய காலகட்டத்தில் உயர்நிலைப் பள்ளி தேர்வில் அதிகப்படியாக காப்பி அடிக்க வாய்ப்பு இருப்பதாக கூறப்படும் கௌசாம்பி இடத்தில் உள்ள 13 பள்ளிகளில் எந்தவொரு மாணவ- மாணவியரும் தேர்ச்சி பெறவில்லை.

இதேபோல மேல்நிலைப் பள்ளி தேர்வில் அலிகார், மற்றும் மணிபூரில் தலா 7 பள்ளிகள் பூஜ்ஜிய சதவீத தேர்ச்சியை பெற்றுள்ளன. இதனிடையே பள்ளி தேர்வின்போது மாணவர்கள் காப்பி அடிப்பதை தடுக்க கடுமையான நடவடிக்கை மேற்கொள்ளப்பட்டதாக உத்தரப்பிரதேச பள்ளிக் கல்வி இயக்குநரான வினய் குமார் கூறியுள்ளார். அதனால் தேர்ச்சி விகிதம் குறைந்ததாகவும் தெரிவித்துள்ளார்.

10-ஆம் வகுப்பை பொருத்தவரை 50 அரசு பள்ளிகளும், 5 அரசு உதவி பெறும் பள்ளிகளும் 84 தனியார் பள்ளிகளும் 0 சதவீத தேர்ச்சியை பெற்றுள்ளன. 12-ஆம் வகுப்பை பொருத்தவரை 15 அரசுப் பள்ளிகளும், 58 அரசு உதவிப் பெறும் பள்ளிகளும், 176 தனியார் பள்ளிகளும் பூஜ்ஜிய சதவீத தேர்ச்சியை பெற்றுள்ளன.