தலைப்புச் செய்திகள் | மீனவர்கள் குறித்து பேசிய பிரதமர் முதல் ஜார்ஜியாவில் ஏற்பட்ட விஷவாயு கசிவு வரை!

மனிதாபிமான அடிப்படையில் மீனவர்களின் வாழ்வாதாரத்தை அணுக வேண்டும் என இலங்கை அதிபர் அநுர குமார திஷநாயகவிடம் பிரதமர் நரேந்திர மோடி வேண்டுகோள்.

மீனவர்கள் பிரச்சினை குறித்து பிரதமர் மோடி, இலங்கை அதிபரிடம் பேசியதற்கு முதலமைச்சர் ஸ்டாலின் வரவேற்பு. தமிழக மீனவர்களை விடுவிப்பது, படகுகளை திருப்பி அனுப்புவது குறித்து பரிசீலிக்குமாறு அதிபர் அநுர குமார திஷநாயகவுக்கு கோரிக்கை.

டங்ஸ்டன் சுரங்க ஏலத்தை மத்திய அரசு ரத்து செய்யும் வரை போராட்டம் தொடரும் என மதுரை அரிட்டாபட்டி கிராம மக்கள் முடிவு.

ஒரே நாடு ஒரே தேர்தல் மசோதா மக்களவையில் இன்று தாக்கல். இந்நிலையில், மக்கள் விரோத அராஜக போக்கினை ராகுல் காந்தி முறியடிப்பார் என தமிழக காங்கிரஸ் தலைவர் செல்வப்பெருந்தகை உறுதி.

போச்சம்பள்ளி அருகே வெல்டிங் பட்டறையில் ஏற்பட்ட வெடிவிபத்தில் ஒருவர் உயிரிழப்பு. இந்நிலையில், இரும்பு பெட்டியில் வெடி பொருள் இருந்ததா என காவல்துறையினர் விசாரணை.

ஆண்டாள் கோயில் விவகாரத்தில், நடக்காத செய்தியை நடந்ததாக பரப்புவதாக இளையராஜா ஆதங்கம். எந்த இடத்திலும் சுயமரியாதையை விட்டுக் கொடுப்பவன் அல்ல; விட்டுக்கொடுக்கவும் இல்லை என்றும் விளக்கம்.

இளையராஜாவே இசைக்கடவுள்தான், அவர் கோயிலுக்கு செல்ல வேண்டிய அவசியம் இல்லை என நடிகை கஸ்தூரி கருத்து.

விஜய் பங்கேற்ற நூல் வெளியீட்டு விழாவில் கலந்து கொள்ளக் கூடாது என அழுத்தம் கொடுத்ததா திமுக? என்ற கேள்விக்கு அமைச்சர் எ.வ.வேலு திட்டவட்டமாக மறுப்பு.

வங்கக்கடலில் நிலவும் காற்றழுத்த தாழ்வு பகுதியால் இன்று 4 மாவட்டங்களில் மிக கனமழைக்கு வாய்ப்பு. சென்னை, திருவள்ளூர், காஞ்சிபுரத்தில் கனமழை பெய்யக்கூடும் என வானிலை ஆய்வு மையம் கணிப்பு.

தேனி சுற்றுவட்டார பகுதிகளில் பெய்து வரும் மழையால் எலிவால் அருவிக்கு நீர்வரத்து அதிகரிப்பு. ஆர்ப்பரிக்கும் அருவியை கண்டு சுற்றுலாப்பயணிகள் உற்சாகம்.

புதுச்சேரி அரசுக்கு சொந்தமான ஹோட்டலை இயக்குநர் விக்னேஷ் சிவன் விலைக்கு கேட்கவில்லை என சுற்றுலாத்துறை அமைச்சர் லட்சுமி நாராயணன் பேட்டி.

கோவை குண்டுவெடிப்பு வழக்கு கைதி பாஷா உயிரிழப்பு. உடல்நலக்குறைவால் வீட்டில் இருந்தே சிகிச்சை பெற்று வந்த நிலையில் மரணம்.

மின்னணு வாக்குப்பதிவு இயந்திரங்கள் குறித்த புகார்களில் எந்த முகாந்திரமும் இல்லை என திரிணாமுல் காங்கிரஸ் எம்.பி அபிஷேக் பானர்ஜியின் கருத்தால் இந்தியா கூட்டணியில் சலசலப்பு.

ஜார்ஜியாவில் உணவகத்தில் விஷவாயு கசிந்ததில் இந்தியர்கள் 11 பேர் உயிரிழப்பு. உடல்களை தாயகம் எடுத்து வர நடவடிக்கை எடுக்கப்பட்டு வருவதாக தூதரகம் விளக்கம்.

கனடா துணை பிரதமர் கிறிஸ்டியா ஃப்ரீலேண்ட் ராஜினாமா. பிரதமர் ஜஸ்டின் ட்ரூடோவுடன் கருத்து வேறுபாடு ஏற்பட்டதால் பதவி விலகல்.

முதலமைச்சர் மு.க.ஸ்டாலினின் செயலாளர்கள் கவனிக்கும் துறைகள் மாற்றியமைப்பு. செயலாளர் அனு ஜார்ஜ் 136 நாட்கள் விடுமுறையில் செல்வதால் மாற்றியமைத்த தமிழ்நாடு அரசு.

முதல்வரின் காலை உணவு திட்டத்தால் 90 விழுக்காடு குழந்தைகளின் நினைவாற்றல் அதிகரிப்பு என மாநில திட்டக்குழு ஆய்வறிக்கையில் தகவல்.