1 மணி தலைப்புச் செய்திகள்: நீதிமன்ற வளாகத்தில் கொலை செய்யப்பட்ட இளைஞர் முதல் மோகன் பகவத் அறிவுரை வரை

நெல்லையில் நீதிமன்ற வாயில் அருகே இளைஞர் கொல்லப்பட்ட சம்பவத்தில் இதுவரை 4 பேர் கைது. கைதானவர்கள், நீதிமன்றத்தில் ஆஜராக வந்தவரை முன் பகை காரணமாக கொலை செய்ததாக வாக்குமூலம்.

ஈரோட்டில் 951 கோடி ரூபாயில் 559 முடிவுற்ற திட்டப் பணிகளை தொடங்கி வைத்தார் முதலமைச்சர் மு.க. ஸ்டாலின். 50 ஆயிரத்து 88 பயனாளிகளுக்கு நலத்திட்ட உதவிகளையும் வழங்கினார்.

மத்திய அரசின் தவறான செயல்பாடுகளை கீச்சுக் குரலில் கூட அதிமுக விமர்சிப்பதில்லை எனவும், திமுக அரசு மீது பொய்யான குற்றச்சாட்டுகளை முன்வைப்பது இபிஎஸ் வகிக்கும் எதிர்க்கட்சித் தலைவர் பதவிக்கு அழகல்ல எனவும் கருத்து.

ஜனவரி 6ஆம் தேதி ஆளுநர் உரையுடன் கூடுகிறது தமிழக சட்டப்பேரவை என சபாநாயகர் அப்பாவு அறிவிப்பு.

பொங்கல் பண்டிகையில் யுஜிசி-நெட் தேர்வு நடத்த அறிவிப்பு வெளியாகி உள்ளதாக மதுரை எம்பி சு. வெங்கடேசன் பதிவு. தேர்வு தேதிகளை மாற்றுமாறு மத்திய கல்வி அமைச்சர் தர்மேந்திர பிரதான், தேசிய தேர்வு முகமைக்கு கடிதம்.

வங்கக் கடலில் நிலவும் ஆழந்த காற்றழுத்த தாழ்வு பகுதி வலுப்பெற வாய்ப்பு.12 மணி நேரத்திற்குள் காற்றழுத்த தாழ்வு மண்டலமாக மாறும் என வானிலை ஆய்வு மையம் கணிப்பு.

தஞ்சை பாபநாசம் அருகே திறப்பு விழாவுக்கு முன்பே சேதமான புதிய சாலை. சாலையோர தடுப்புகள் சரிந்தன. நெடுஞ்சாலையின் பல்வேறு இடங்களில் விரிசல்.

நாடாளுமன்ற வளாகத்தில் தடை விதிக்கப்பட்டதால் விஜய் சவுக் பகுதியில் இந்தியா கூட்டணி கட்சிகள் போராட்டம். ராகுல் காந்தி மீதான வழக்குப்பதிவு மற்றும் அமித் ஷாவை கண்டித்து ஆர்ப்பாட்டம்.

டெல்லியில் மத்திய உள்துறை அமைச்சர் அமித் ஷாவின் காரை மறித்த எதிர்க்கட்சி எம்பிக்கள். அம்பேத்கரை அவமதித்ததற்காக மன்னிப்பு கேட்கக் கோரி முழக்கம்.

சபாநாயகர் ஒம் பிர்லா அளிக்கும் தேநீர் விருந்தை புறக்கணிக்க இந்தியா கூட்டணி முடிவு. மக்களவையில் ஜனநாயகம் இல்லை என குற்றச்சாட்டு.

அமித் ஷாவை கண்டித்து இன்றும் மக்களவையில் இந்தியா கூட்டணிக் கட்சிகள் அமளி. வந்தே மாதரம் பாடலை ஒலிக்கச் செய்து அவையை தேதி குறிப்பிடப்படாமல் ஒத்திவைத்தார் சபாநாயகர்.

மக்களவையைத் தொடர்ந்து மாநிலங்களவையும் தேதி குறிப்பிடப்படாமல் ஒத்திவைப்பு. எம்.பி.க்களின் போராட்டம் அவை நடவடிக்கைகளை முடக்கியதாக அவைத் தலைவர் ஜக்தீப் தன்கர் வருத்தம்.

அம்பேத்கரை அவமதித்ததாக அமித்ஷாவை கண்டித்து தமிழகம் முழுவதும் விசிகவினர் 2ஆவது நாளாக போராட்டம். சென்னை, விழுப்புரம் உள்ளிட்ட பகுதிகளில் ரயில் மறியலில் ஈடுபட்ட விசிகவினர் கைது.

சென்னை - கும்மிடிப்பூண்டி இடையே உயர் மின்னழுத்த கம்பி அறுந்து 3 மணி நேரமாக ரயில் சேவை பாதிப்பு. சீரமைப்பு பணிகளுக்கு பின் விரைவு மற்றும் புறநகர் ரயில்கள் மீண்டும் இயக்கம்.

புனேவில் ஓடும் பேருந்தில் பாலியல் சீண்டலில் ஈடுபட்ட இளைஞருக்கு பாடம் புகட்டிய பெண். 26 முறை மாறிமாறி அறைந்து, போதை இளைஞரின் கன்னத்தைப் பழுக்க வைத்த வீடியோ வைரல்.

ஹரியானா முன்னாள் முதலமைச்சரும் இந்திய தேசிய லோக் தள கட்சியின் தலைவருமான ஓம் பிரகாஷ் சவுதாலா காலமானார். இவர், மாரடைப்பு காரணமாக உயிர் பிரிந்ததாக மருத்துவர்கள் தகவல்.

ராமர் கோயிலை விவகாரத்தை முன்மாதிரியாக எடுத்துக் கொண்டு மற்ற பகுதிகளில் சர்ச்சைகளை ஏற்படுத்த வேண்டாம் என இந்து மத தலைவர்களுக்கு ஆர்.எஸ்.எஸ். தலைவர் மோகன் பகவத் அறிவுறுத்தல்.

ஜெய்ப்பூரில் ரசாயனம் ஏற்றிச் சென்ற வாகனம் மோதியதில் அருகில் இருந்த 40 வாகனங்களுக்கு பரவிய தீ. 5 பேர் உயிரிழப்பு. 30க்கும் மேற்பட்டோர் காயத்துடன் மருத்துவமனையில் அனுமதி.

தொடர்ந்து குறைந்து வருகிறது ஆபரணத் தங்கத்தின் விலை. 4 நாட்களில் 880 ரூபாய் குறைந்த நிலையில், இன்று ஒரு சவரன் 56,320 ரூபாய்க்கு விற்பனை.

பெரும் எதிர்பார்ப்புக்கு மத்தியில் வெளியானது "விடுதலை 2" திரைப்படம். முதல் காட்சியை ஆர்வமுடன் கண்டுரசித்தனர் ரசிகர்கள்.

விடுதலை 2ஆம் பாகத்தை தொடர்ந்து மூன்றாம் பாகம் வருமா? என்ற கேள்விக்கு, “இந்த படத்தின் வரவேற்பை பொறுத்தே அதெல்லாம் யோசிக்கப்படும்” என்று திருச்சியில் ரசிகர்களுடன் படம் பார்த்த நடிகர் சூரி சுவாரஸ்ய பதில்.