’அரசு ஊழியர்களே கவனம்.. பெற்றோர்களை பராமரிக்க தவறினால் சம்பள பிடித்தம்..’ - ரேவந்த் ரெட்டி

தெலங்கானா மாநிலம் ஹைதராபாத் பிரஜா பவனில் ‘பால பரோசா’ மற்​றும் ‘பிரணாம் டே கேர்’ ஆகிய திட்டங்களை அம்மாநில முதல்வர் ரேவந்த் ரெட்டி தொடங்கி வைத்தார். தொடர்ந்து, மாற்றுத் திறனாளிகளுக்கு 50 கோடி மதிப்பிலான உபகரணங்களை வழங்கினார். தொடர்ந்து இந்நிகழ்ச்சியில் பேசிய அவர், ” இந்த அரசு உங்களுக்காக செயல்படுகிறது என்பதை காட்டுவதற்காகவே இந்த திட்டங்களை கொண்டு வந்திருக்கிறோம். மாற்றுத் திறனாளிகள் ஒருவரை ஒருவர் மணக்கும் போது அவர்களுக்கு 2 லட்சம் ரூபாய் நிதி உதவி வழங்கப்படும். அதேசமயத்தில், மாற்றுத் திறனாளி ஒருவரை மணக்கும் போதும் அதே தொகை வழங்கப்படும். மேலும், அரசு வேலைகளிலும் மாற்றுத் திறனாளிகளுக்கு உரிய இடம் வழங்கி வருகிறோம்” எனத் தெரிவித்தார்.

தொடர்ந்து பேசிய அவர், ” பிரணாம் திட்டத்தின் மூலம் முதியவர்களை ஆதரிக்க அரசு முடிவு செய்துள்ளது. இந்நிலையில், இனி பெற்றோரை கைவிடும் அரசு ஊழியர்களின் மாத சம்பளத்தில் 10% முதல் 15% வரை பிடித்தம் செய்து, அதை நேரடியாக அவர்களுடைய பெற்றோரின் வங்கிக் கணக்குகளுக்கு செலுத்த முடிவு செய்திருக்கிறோம். பெற்றோர்களை கைவிடுபவர்களை நாமே வழிக்குக் கொண்டுவர வேண்டும். பெற்றோர்களுக்கு உபயோகப்படாதவர்கள், சமூகத்திற்கும் பயன்படமாட்டார்கள்” எனத் தெரிவித்தார்.