ஊதிய உயர்வை நிராகரித்த நவீன் பட்நாயக்.. மக்கள் நலனுக்கு பயன்படுத்த முதலமைச்சருக்கு கோரிக்கை..

ஒடிசாவின் முன்னாள் முதல்வரும், தற்போதைய ஒடிசா சட்டமன்ற எதிர்க்கட்சித் தலைவருமான நவீன் பட்நாயக், மாநில சட்டமன்றம் நிறைவேற்றிய எதிர்க்கட்சித் தலைவர் பதவிக்கான உயர்த்தப்பட்ட சம்பளம் மற்றும் படிகளை ஏற்க மறுத்து, அதை ஒடிசாவின் ஏழை மக்களின் நலனுக்காகப் பயன்படுத்தக் கோரி, ஒடிசா முதலமைச்சர் மோகன் சரண் மாஜி அவர்களுக்குக் கடிதம் எழுதியுள்ளார்.

கடந்த 25 ஆண்டுகளுக்கும் மேலாக ஒடிசா மக்களின் அன்பு, பாசம் மற்றும் ஆதரவால்தான் ஆசீர்வதிக்கப்பட்டதாக நவீன் பட்நாயக் குறிப்பிட்டுள்ளார். மக்களுக்கும், தனது மறைந்த தந்தை பிஜு பட்நாயக் மீதான அவர்களின் அன்புக்கும் தான் மிகவும் கடமைப்பட்டிருப்பதாகவும் அவர் தெரிவித்துள்ளார்.

2015 ஆம் ஆண்டில், தங்கள் குடும்பத்தின் மூதாதையர் சொத்தான கட்டாக்கில் 'ஆனந்த் பவன்'-ஐ ஒடிசா மக்களின் பயன்பாட்டிற்காக நன்கொடையாக வழங்க முடிவெடுத்ததை அவர் நினைவூட்டியுள்ளார். அதே மனப்பான்மையுடன், தற்போது சட்டமன்றம் நிறைவேற்றிய எதிர்க்கட்சித் தலைவருக்கான உயர்த்தப்பட்ட சம்பளம் மற்றும் படிகளை ஏற்கத் தான் விரும்பவில்லை என்று அவர் தெரிவித்துள்ளார். அந்த நிதியை, ஒடிசா மாநிலத்தின் ஏழை மக்களின் நலனுக்காகப் பயன்படுத்துமாறு முதல்வர்  மோகன் சரண் மாஜிக்கு அவர் வேண்டுகோள் விடுத்துள்ளார்.