“மிகவும் மோசமான நிலையில் இருக்கிறார் பாரிக்கர்” - துணை சபாநாயகர்

கோவா முதலமைச்சர் மனோகர் பாரிக்கர் கடவுள் ஆசிர்வாதத்தில் வாழ்கிறார் என அம்மாநில துணை சபாநாயகர் மைக்கேல் லோபோ தெரிவித்துள்ளார்.

63 வயதாகும் கோவா முதலமைச்சர் மனோகர் கணைய கோளாறு காரணமாக உடல்நிலை சரியின்றி உள்ளார். கடந்த ஒருவருடமாக அவர் அமெரிக்காவின் நியூயார்க், டெல்லி எய்ம்ஸ், மும்பை மற்றும் கோவாவிலுள்ள மருத்துவமனைகளில் சிகிச்சை பெற்று வருகிறார். கடந்த வாரம் கோவா சட்டமன்றத்திற்கு மூக்கில் ஒரு டியூப் பொருந்திய நிலையில் அவர் வருகை தந்தார். இதையடுத்து, கடந்த ஜனவரி 31ஆம் தேதி முதல் தற்போது வரை அவர் டெல்லி எய்ம்ஸ் மருத்துவமனையில் சிகிச்சை பெற்று வருகிறார்.

அவரது உடல்நிலை தொடர்பாக பேசிய கோவா சட்டமன்ற துணை சபாநாயகர் லோபோ, “பாரிக்கரின் உடல்நிலை இன்னும் சரியாகவில்லை. அவர் முதலமைச்சராக இருப்பதால் இங்கு எந்த அரசியல் நெருக்கடியும் இல்லை. ஆனால் பாரிக்கரின் உடல்நிலை மோசமடைந்து அதன் காரணமாக அவருக்கு ஏதாவது நேர்ந்தால், இங்கு அரசியல் நெருக்கடி ஏற்படும்.

அவர் மிகவும் மோசமான உடல்நிலையில் இருக்கிறார்” எனத் தெரிவித்தார். அத்துடன் “பாரிக்கர் இன்னும் வாழ்வதும், பணிபுரிவதும் கடவுளின் ஆசிர்வாதத்தால்தான்” எனவும் அவர் குறிப்பிட்டார். தற்போது கோவாவில் பாஜக கூட்டணி ஆட்சி நடைபெற்று வருவது குறிப்பிடத்தக்கது.