நாடாளுமன்ற கூட்டத் தொடர்: ”எதிர்க்கட்சிகள் ஒத்துழைக்க வேண்டும்” - மத்திய அமைச்சர் கிரண் ரிஜிஜூ.!
நாடாளுமன்ற குளிர்கால கூட்டத்தொடர் நாளை துவங்க இருப்பதை முன்னிட்டு அரசின் சார்பில் நாடாளுமன்ற வளாகத்தில் அனைத்து கட்சி கூட்டம் நடைபெற்றது. கூட்டத்துக்குப் பின்னர் அதில் கலந்து கொண்ட நாடாளுமன்ற விவகாரத் துறை அமைச்சர் கிரண் ரிஜிஜூ அனைத்து கட்சி கூட்டம் குறித்து செய்தியாளர்களிடம் விளக்கினார்.
அப்போது பேசிய அவர், ”நாடாளுமன்ற குளிர்காலக் கூட்டத்தொடர் சுமூகமாக நடைபெறுவதை உறுதி செய்வதற்காக, எதிர்க்கட்சிகளுடன் தொடர்ந்து இணைந்து செயல்படுவோம் என்று அரசாங்கத்தின் சார்பாக நான் உறுதியளிக்கிறேன். எதிர்க்கட்சித் தலைவர்கள் நாடாளுமன்றம் சுமூகமாக இயங்குவதை உறுதி செய்வதில் ஒத்துழைக்க வேண்டும். அரசியல் கட்சிகளுக்கு இடையே வேறுபாடுகள் உள்ளன. ஒவ்வொருவரும் அவரவர் சித்தாந்தங்கள் மற்றும் குறிக்கோள்களுடன் செயல்படுகிறோம். எனவே, வேறுபாடுகள் இருக்கும்.
இந்த வேறுபாடுகள் இருந்தாலும், நாம் அனைவரும் அவையை தொந்தரவு செய்ய வேண்டாம். நாம் என்ன எதிர்ப்பை எழுப்ப விரும்பினாலும், அவையில் பேசுவதன் மூலம் அதைச் செய்ய வேண்டும். நாம் எந்த வகையிலும் அவையை சீர்குலைக்கக்கூடாது. அவை நடவடிக்கைகள் தொடர வேண்டும் . நாடாளுமன்றம் செயல்படாது என்றோ அல்லது செயல்பட விடமாட்டோம் என்றோ யாரும் சொல்லவில்லை. சில தலைவர்கள் SIR குறித்து அவையில் கூச்சலிடலாம் என்று கூறினர்.
எதிர்க்கட்சிகளின் பேச்சைக் கேட்க நாங்கள் தயாராக இருக்கிறோம் என்பதை நேர்மறையான முறையில் நான் சொல்கிறேன். நாடாளுமன்றம் அனைவருக்கும் சொந்தமானது. நாடாளுமன்றத்தில் ஒவ்வொரு பிரச்சினையையும் விவாதிக்க ஒரு முறை உள்ளது; விதிகள் உள்ளன; மரபுகள் உள்ளன” என கிரண் ரிஜிஜூ தெரிவித்தார்.
