ப.சிதம்பரத்திற்கு ஆக. 30 வரை சிபிஐ காவல் நீட்டிப்பு

ஐ.என்.எக்ஸ் மீடியா முறைகேடு வழக்கில் முன்னாள் மத்திய அமைச்சர் ப.சிதம்பரத்தின் சிபிஐ காவல் வரும் 30ஆம் தேதி வரை நீட்டிக்கப்பட்டுள்ளது. 

ஐ.என்.எக்ஸ் மீடியா முறைகேடு வழக்கில் கைது செய்யப்பட்ட ப.சிதம்பரத்திற்கு 5 நாள் சிபிஐ காவல் விதித்து நீதிமன்றம் உத்தரவிட்டது. அந்த காவல் இன்றுடன் முடிவடைகிறது. அதனால், டெல்லியில் உள்ள சிபிஐ சிறப்பு நீதிமன்றத்தில் ப.சிதம்பரம் இன்று ஆஜர்படுத்தப்பட்டார். ப.சிதம்பரத்தை மேலும் 5 நாட்கள் காவலில் விசாரிக்க அனுமதி கோரி சிபிஐ தரப்பில் மனு தாக்கல் செய்யப்பட்டது.

அப்போது, கடந்த 5 நாட்களாக ப.சிதம்பரம் விசாரணைக்கு ஒத்துழைக்கவில்லை எனவும் சிபிஐ தரப்பில் குற்றச்சாட்டு முன் வைக்கப்பட்டது. இருதரப்பு வாதங்களை கேட்ட நீதிபதி ப.சிதம்பரத்தின் காவலை 30ஆம் தேதி வரை நீட்டித்து உத்தரவிட்டார்.