டிட்வா புயலால் பாதிக்கப்பட்டுள்ள இலங்கை.. இரு கப்பல்களை அனுப்பிய இந்தியா

பெருமழையையும் கட்டவிழ்ந்த வெள்ளத்தையும் எதிர்கொண்டுள்ள இலங்கைக்கு உதவ ‘ஆப்பரேஷன் சாகர் பந்து’ நடவடிக்கையின் கீழ் தனது இரு கப்பல்களை அனுப்பியுள்ளது இந்தியா. சரி, இலங்கைக்கு உதவச் சென்றுள்ள அந்தக் கப்பல்களின் சிறப்பம்சம் என்ன? பார்ப்போம்! ஐ.என்.எஸ். விக்ராந்த், ஐஎன்ஸ் உதயகிரி… இந்த இரு போர்க்கப்பல்கள்தான் ‘டிட்வா’ புயலால் பாதிக்கப்பட்டிருக்கும் இலங்கைக்கு உதவச் சென்றுள்ளன.

ஐ.என்.எஸ். விக்ராந்த் இந்தியாவில் தயாரிக்கப்பட்ட முதல் விமானம் தாங்கிப் போர்க்கப்பல். 2022இல் இந்திய கடற்படையில் சேர்க்கப்பட்டது. 262 மீட்டர் நீளமும், 62 மீட்டர் அகலமும், 45,000 டன் எடையும் கொண்டது. ஒரு லட்சத்து 34 ஆயிரம் சதுரடி பரப்பளவு கொண்ட இந்தக் கப்பலின் விரிவு இரண்டு கால்பந்து மைதானங்களுக்கு இணையானது.

விக்ராந்தில் ஒரே நேரத்தில் 1600 முதல் 1700 பேர் வரை பயணிக்க முடியும். இவ்வளவு பிரம்மாண்ட பரப்பளவின் காரணமாகவே விக்ராந்த், ‘மிதக்கும் நகரம்’ என்று குறிப்பிடப்படுகிறது. மிகப்பெரிய விமானம்தாங்கிக் கப்பல் என்பதால், இதில் பெருமளவு நிவாரணப் பொருட்களை எடுத்துச் செல்வதுடன், அதிக எண்ணிக்கையிலான ஹெலிகாப்டர்களையும் மீட்புப் பணியில் பயன்படுத்த முடியும்.

ஐ.என்.எஸ். உதயகிரி. இந்தியாவிலேயே கட்டப்பட்ட அதிநவீன ஏவுகணை தாங்கி போர்க்கப்பல். ரேடாரில் சிக்காமல் கடலில் பயணிக்கும் வல்லமை பெற்றது உதயகிரி. சுமார் 149 மீட்டர் நீளமும், 6,670 டன் எடையும் கொண்டது. இந்தக் கப்பல் மணிக்கு 28 நாட் ((Knot)) அல்லது 52 கிலோ மீட்டர் வேகத்தில் பயணிக்கும். இது நீர், வான் மற்றும் நீர்மூழ்கி எதிர்ப்புப் போர்களில் ஈடுபடக்கூடிய பல்நோக்கு போர்க்கப்பல். அதிவேகத்துக்குப் பேர் போனது என்பதால், புயலால் பாதிக்கப்பட்ட கடற்கரைப் பகுதிகளை உடனடியாக அடைய முடியும்; மீட்பு நடவடிக்கைகளைத் துரிதமாக ஒருங்கிணைக்க முடியும் என்பதால் உதயகிரி அனுப்பப்பட்டுள்ளது.

இலங்கைக்கு இக்கட்டான தருணத்தில் இரு கப்பல்களுமே பெரும் உதவியாக அமையும்!