இந்தியாவின் நேரடி வரிவசூல் 19.60 லட்சம் கோடி.. 10 ஆண்டுகளில் இல்லாத அளவிற்கு அதிகரிப்பு!

2023-24ஆம் நிதியாண்டில் 19 லட்சத்து 60 ஆயிரம் கோடி ரூபாய் நேரடி வரிவசூல் செய்யப்பட்டுள்ளது. இது கடந்த ஆண்டுகளில் இல்லாத அதிகளவு என வருமானவரித் துறை கூறியுள்ளது.

இதில், கார்ப்பரேட் நிறுவனங்களின் வரி வசூல் இருமடங்காக உயர்ந்து 9 லட்சத்து 11 ஆயிரம் கோடி ரூபாயாக அதிகரித்துள்ளது என்றும் தனிநபர் வருமான வரி வசூல் 4 மடங்கு உயர்ந்து 10 லட்சத்து 45 ஆயிரம் கோடி ரூபாயாக அதிகரித்துள்ளதாகவும் தெரிவிக்கப்பட்டுள்ளது.

பாஜக அரசு பொறுப்பேற்ற 2014-15ஆம் நிதியாண்டில் மொத்த நேரடி வரிவசூல் 6 லட்சத்து 96 ஆயிரம் கோடி ரூபாயாக மட்டுமே இருந்ததாகவும் தெரிவிக்கப்பட்டுள்ளது. இதில், கார்ப்பரேட் நிறுவனங்களில் வரிவசூல் 4 லட்சத்து 29 ஆயிரம் கோடி ரூபாயாகவும், தனிநபர் வரிவசூல் 2 லட்சத்து 66 ஆயிரம் கோடி ரூபாயாகவும் இருந்ததாக தெரிவிக்கப்பட்டுள்ளது.

2014-15ஆம் நிதியாண்டில் வருமானவரி கணக்கு தாக்கல் செய்தவர்களின் எண்ணிக்கை 4 கோடியே 4 ஆயிரமாக இருந்த நிலையில், கடந்த நிதியாண்டில் அது 8 கோடியே 61 லட்சமாக உயர்ந்துள்ளதாகவும் குறிப்பிடப்பட்டுள்ளது.

அதேபோல, 2014-15ஆம் நிதியாண்டில் 5 கோடியே 70 லட்சம் பேராக இருந்த வரி செலுத்தியவர்களின் எண்ணிக்கை, கடந்த நிதியாண்டில் 10 கோடியே 41 லட்சமாக உயர்ந்திருப்பதாகவும் வருமானவரித் துறை கூறியுள்ளது.