மகாராஷ்டிர தேர்தலில் உற்சாகத்துடன் வாக்களித்த பாலிவுட் நட்சத்திரங்கள் 

மகாராஷ்டிராவில் திரைத்துறை பிரபலங்கள் உற்சாகத்துடன் வாக்களித்தனர். பாலிவுட் நடிகர் அமிர்கான் மும்பையின் பாந்த்ரா மேற்கு தொகுதியில் வாக்களித்தார். குடிமக்கள் அனைவரும் அவசியம் வாக்களிக்க வேண்டும் என அவர் கேட்டுக்கொண்டார்.

பிரபல டென்னிஸ் வீரர் மகேஷ் பூபதி தனது மனைவியும் நடிகையுமான லாரா தத்தாவுடன் பாந்த்ரா மேற்குத் தொகுதியில் வாக்களித்தார். இதே தொகுதியில் நடிகை மாதுரி தீக்ஷித், அனைவருடன் வரிசையில் காத்திருந்து வாக்களித்தார்.

முன்னதாக சாஹோ பட நாயகி ஸ்ரத்தா கபூரின் உறவினரும் 80-களில் பாலிவுட்டில் முன்னணி நடிகையாக திகழ்ந்த பத்மினி கோலாபுரி அந்தேரி மேற்குத் தொகுதியில் வாக்களித்தார். உத்தரப்பிரதேசம் கோரப்பூரின் எம்பியும் நடிகருமான ரவி கிஷன், கோரேகான் தொகுதியில் வாக்களித்தார்.

மேலும் மத்திய அமைச்சர் நிதின் கட்காரி மற்றும் அவரது மனைவி காஞ்சனா நாக்பூர் தொகுதியில் உள்ள வாக்குச்சாவடி ஒன்றில் வாக்களித்தனர். தேசியவாத காங்கிரஸ் கட்சித் தலைவர் சரத் பவாரின் மகளும் எம்பியுமான சுப்ரியா சூலே பாராமதி தொகுதியில் வாக்களித்தார். தேசியவாத காங்கிரஸ் கட்சியின் மூத்த தலைவரும் கோன்டியா தொகுதி வேட்பாளருமான பிரஃபுல் படேல் தனது மனைவி வர்ஷாவுடன் ஜனநாயக கடமையாற்றினார்.