காசநோய் ஒழிப்பில் முட்டுக்கட்டை?? கவலை தெரிவித்த WHO.. திணறும் நாடுகள்??
உலக அளவில் ஒரே ஒரு தொற்றுநோயால் அதிக உயிரிழப்புகள் ஏற்படுகிறது என்றால், அதற்கு இன்றும் காசநோய்தான் முதன்மைக் காரணமாக இருக்கிறது என உலக சுகாதார அமைப்பு எச்சரித்துள்ளது. அந்த அமைப்பின் அறிக்கையில் முக்கிய சாராம்சங்களை பார்க்கலாம்.
காசநோய் என்பது வெறும் தொற்றுநோய் மட்டுமல்ல, அது ஒரு தீவிரமான சமூக மற்றும் பொருளாதாரப் பிரச்சனையாக உருவெடுத்துள்தை உலக சுகாதார அமைப்பின் அறிக்கை சுட்டிக்காட்டுகிறது. உலக அளவிலான மொத்த பாதிப்பில் கால் பங்கு இந்தியாவிலும், மூன்றில் ஒரு பங்கு தென்கிழக்கு ஆசியாவிலும் பதிவாகியிருப்பது, இப்பிராந்தியத்தில் காசநோயின் அபாயம் இன்னும் குறையவில்லை என்பதையே காட்டுகிறது.
அதாவது, இந்தியாவில் உலகளாவிய காசநோய் பாதிப்புகளில் சுமார் 25% பதிவாகியுள்ளன. தென்கிழக்கு ஆசியாவில் மட்டும் 36 லட்சம் பேர் காசநோயால் பாதிக்கப்பட்டுள்ளனர். காசநோய் ஒழிப்புக்கான நடவடிக்கைகளைத் தீவிரப்படுத்த வேண்டியதன் அவசியம் தற்போது அதிகரித்துள்ளது.
குறிப்பாக, ஊட்டச்சத்துக் குறைபாடு, நீரிழிவு நோய், மது மற்றும் புகைபிடித்தல் போன்ற வாழ்வியல் காரணிகளே காசநோய் பரவுவதற்கு முக்கியத் தூண்டுகோலாக உள்ளன. எனவே, நோய்க்குச் சிகிச்சை அளிப்பதோடு, மக்களின் ஊட்டச்சத்து மற்றும் வாழ்வியல் ஆரோக்கியத்தை மேம்படுத்துவதும் அவசியமாகிறது.
மறுபுறம், காசநோய் ஒழிப்புப் பணிகளுக்குத் தேவையான நிதியுதவியில் சர்வதேச நாடுகளின் பங்களிப்பு குறைந்து வருவது பெரும் சவாலாக உருவெடுத்துள்ளது. வெளிநாட்டு நன்கொடையாளர்களின் நிதியுதவி 14% சரிந்துள்ள நிலையில், காசநோய் தடுப்பு மற்றும் சிகிச்சைக்கான செலவினங்களில் 86% உள்நாட்டு நிதி மூலமாகவே மேற்கொள்ளப்படுகிறது.
தென்கிழக்கு ஆசியாவில் காசநோயால் சுமார் 4 லட்சம் பேர் உயிரிழந்துள்ளதாகக் குறிப்பிடப்பட்டுள்ளது. இந்நிலையில், காசநோய் ஒழிப்புக்காக ஆண்டுக்கு 22 பில்லியன் டாலர் நிதி தேவைப்படுவதாக மதிப்பிடப்பட்டுள்ளது.
எனவே, 2030ஆம் ஆண்டுக்குள் காசநோயை ஒழிக்கும் இலக்கை அடைய, நிதி ஒதுக்கீட்டை அதிகரிப்பதுடன் தடுப்பு மற்றும் சிகிச்சை நடவடிக்கைகளையும் தீவிரப்படுத்த வேண்டும் என வலியுறுத்தப்பட்டுள்ளது.
இதனால், சிகிச்சை பெறும் பாதிக்கும் மேற்பட்ட குடும்பங்கள் கடுமையான பொருளாதார நெருக்கடிக்குத் தள்ளப்படுகின்றன. சுருக்கமாகக் கூறினால், வெளிநாட்டு நிதியை மட்டுமே நம்பியிருக்காமல், உள்நாட்டு நிதி ஒதுக்கீட்டை அதிகரித்து, நோயாளிகளின் மருத்துவச் செலவுச் சுமையைப் பூஜ்ஜியமாக்க வேண்டும் என்கிறது உலக சுகாதார அமைப்பு. நோய் ஒழிப்பு நடவடிக்கைகளை விரைவுபடுத்தி 2030ஆம் ஆண்டுக்குள் காசநோய் பாதிப்பை ஒழிக்க வேண்டும் எனக் கேட்டுக்கொண்டுள்ளது உலக சுகாதார அமைப்பு.