என்ன ஒரு துணிச்சல்... கும்பலாக வந்து கொள்ளையடித்த குடும்பம்!

திண்டுக்கல்லில் ரெடிமேட் துணிக்கடையில் குடும்பத்துடன் நுழைந்த கொள்ளை கும்பல் 50-க்கும் மேற்பட்ட ஆடைகளை திருடிச் சென்றுள்ளனர். சிசிடிவி கேமராவில் இந்த சம்பவம் பதிவாகியுள்ளது.

திண்டுக்கல் பேருந்து நிலையம் அருகே மெங்கில்ஸ் ரோடு சாலையில் கோயம்புத்தூரை சேர்ந்த அர்ஜீன் என்பவருக்கு சொந்தமான ரெடிமேட் துணிக்கடை உள்ளது. இந்த கடையை அர்ஜீன் உறவினரான திண்டுக்கல்லை சேர்ந்த ராஜேஸ் மற்றும் அவரது மனைவியும் பராமரித்து வருகின்றனர்.

இந்நிலையில் நேற்று காலை சுமார் 11.30 மணிக்கு 2 பெண்கள், கை குழந்தை, மற்றும் 3 ஆண்கள் கடைக்கு வந்துள்ளனர். கடையில் ராஜேஸ் மற்றும் அவரது மனைவியும் இருந்துள்ளனர். அவர்களிடம் ஆடைகள் எடுப்பதாக கூறி கணவன், மனைவி இருவரையும் தனித்தனியாக பிரித்து ஆடைகளை பார்ப்பது போல் நடித்துள்ளனர். இதனிடையே ஒரு பெண் கடையில் இருந்து ஆடைகளை அருகில் இருந்த சேர் மேல் வைத்துள்ளார். கையில் குழந்தை வைத்திருந்த மற்றொரு பெண் குழந்தையை கீழே இறக்கி விட்டு 50-க்கும் மேற்பட்ட ஆடைகளை எடுத்து தனது சேலையில் மறைத்து விட்டு மீண்டும் குழந்தையை தோளில் தூக்கி விட்டு வெளியே சென்று போது டேபிள் மேல் விற்பனைக்காக வைத்திருந்த மணி பர்சை குழந்தை தெரியாமல் கையில் எடுத்து சென்றது. பர்சை எடுத்து விட்டு அதற்கு உரிய கவரை மட்டும் டேபிள் மேல் வைத்துள்ளனர்.

கொள்ளை குடும்பத்தினர் அனைவரும் ஒரு ஆடையை எடுத்து விட்டு அதற்கு உரிய பணத்தையும் செலுத்தி விட்டு சென்றுள்ளனர். பின்னர் கடையில் இருந்த கணவன், மனைவி இருவரும் டேபிள் மேல் வைத்திருந்த பர்சை காணவில்லை என்று தேடி பார்த்துள்ளனர். அப்பொழுது கடையில் இருந்து சி.சி.டி.வி கேமரா மூலம் பர்ஸ் எப்படி தொலைந்தது என்று பார்த்த பொழுது குடும்பத்துடன் வந்தவர்கள் 50-க்கும் மேற்பட்ட ஆடைகளை திருடுவது கண்டுபிடிக்கப்பட்டது. இதனை பார்த்து அதிர்ச்சி அடைந்த ராஜேஸ் மற்றும் அவரது மனைவி திண்டுக்கல் நகர் வடக்கு காவல் நிலையத்தில் புகார் தெரிவித்தனர். இச்சம்பவம் குறித்து வழக்கு பதிவு செய்த போலீசார் சி.சி.டி.வி. கேமராவில் பதிவான காட்சிகளை வைத்து குற்றவாளிகளை தேடி வருகின்றனர்.