நூதன முறையில் ரூ. 27 லட்சம் கொள்ளை - பெட்ரோல் பங்கில் வேலைபார்த்த பெண்ணுக்கு வலைவீச்சு

நெல்லை மாவட்டம் பணகுடி அருகே பாம்பன்குளம் சின்னான் காலனி பகுதியைச் சேர்ந்தவர் கதிரவன். இவரது மனைவி ஜெயலட்சுமி. இவருக்கு சொந்தமாக பணகுடி மெயின் ரோட்டில் பெட்ரோல் பங்க் உள்ளது. அங்கு பணகுடியைச் சேர்ந்த சிவ ஆனந்தி (வயது 28) என்பவர் கணக்காளராக வேலைபார்த்து வந்துள்ளார். இந்த நிலையில் கதிரவன் வெளிநாட்டில் வேலைசெய்து வருவதால் பெரிய அளவில் பெட்ரோல் பங்க்  கணக்குகளை பார்ப்பதில்லை எனக் கூறப்படுகிறது. இதனை தனக்கு சாதகமாக பயன்படுத்திக் கொண்ட சிவ ஆனந்தி பெட்ரோல் பங்கில் தனது கைவரிசையை காட்ட ஆரம்பித்துள்ளார்.

அதாவது தினசரி யுபிஐ எனப்படும் கூகுள் பே, போன் பே, பேடிஎம் மூலமாக பங்குக்கு பெட்ரோல் போட வருபவர்கள் பணம் செலுத்துவர். இந்த கணக்கில் அதிகமாக பணம் வந்ததாக கணக்குக்காட்டி சிவ ஆனந்தி தினசரி பணம் எடுத்துள்ளார். அதாவது யுபிஐ மூலமாக அதிக பணம் பங்குக்கு வரவு வந்ததாக கணக்கில் வரவுவைத்து அங்கு விற்பனை மூலம் நேரடியாக வரும் பணத்தில் தினசரி சுமார் 30 ஆயிரம் வரை திருடிவிட்டு யுபிஐ அக்கவுண்டுக்கு வந்ததாக கணக்கில் எழுதிவிடுவார். இதுபோல் நான்கு மாதங்களாக எழுதிவைத்துள்ளார். வங்கியில் வரும் கணக்கை சரிவர கவனிக்காததால் சுமார் 27 லட்சம் ரூபாய் காணாமல் போய்விட்டது. இதனால் ஒன்றும் புரியாமல் கதிரவன் தவித்துள்ளார்.

பின்புதான் கணக்கு வைத்திருக்கும் வங்கி மேலாளரிடம் பணம் காணமல்பேனது பற்றி விசாரிக்கும்போது சிவ ஆனந்தி யுபிஐ-யில் அதிகமாக பணம் வந்ததாகக் கூறி விற்பனையாகும் பணத்தை எடுத்துள்ளது தெரியவந்தது. இதையடுத்து கதிரவன் மனைவி ஜெயலட்சுமி பணகுடி போலீசில் புகார் அளித்தார். பணகுடி போலீசார் பெரிய அளவில் விசாரணை நடத்தியதால் சிவ ஆனந்தி சுதாரித்துக்கொண்டு தலைமறைவாகி விட்டார். இந்நிலையில் நெல்லை மாவட்ட காவல் கண்காணிப்பாளர் சரவணனிடம்  விஜயலட்சுமி புகார் அளித்தார். இதை அடுத்து வழக்குப்பதிவு செய்யப்பட்டு தலைமறைவான சிவ ஆனந்தியை தேடி வருகின்றனர். இந்த நூதன முறையில் 27 லட்ச ரூபாய் மோசடிசெய்த சம்பவம் இந்த பகுதியில் பரபரப்பை ஏற்படுத்தி உள்ளது.