குறிப்பாக, வசனங்கள் கவனம் ஈர்த்திருக்கிறதே?
”வசனங்கள் அனைத்தும் முழுக்க முழுக்க நான்தான் எழுதினேன். நம் வாழ்வின் நிஜத்திலிருந்து எடுத்தது. ஸ்கிரிப்ட் முழுக்க எழுதிவிட்டு வசனங்களுடன்தான் விஷால் சாரிடம் கதையே சொன்னேன். இதுதான் ஒன்லைன் என்று கதை சொல்வதில் எனக்கு உடன்பாடு கிடையாது. ஒரு சினிமாவுக்கு மிகப்பெரிய உந்து சக்தி வசனங்கள்தான். அதுதான் ரசிகர்களையும் ஈர்க்கும். நான் வசனங்களுக்கு முக்கியத்துவம் கொடுக்கும் படங்களின் மீது பற்றுள்ள ஆள். உதாரணமா, மணிரத்னம் சாரின் ’தளபதி’ உள்ளிட்ட, அவரின் எல்லா படங்களும் எனக்கு ஒரு இன்ஸ்பிரேஷன். என் அடுத்தப் படங்களுக்கும் அப்படித்தான் எழுதுவேன். ”ஒரு குற்றவாளி எங்கருந்து உருவாகிறான்? நம்மை காப்பாத்துறதுக்கு ஒருத்தன் இருக்கான் என்று நினைக்கும்போதுதான்’ அந்த வசனத்திலிருந்துதான் கதையே எழுத ஆரம்பித்தேன். கடைசியில் பொன் பார்த்திபன் வசனதுக்கு கரெக்ஷன் பண்ணுறதுக்கு கொஞ்சம் ஹெல்ப் பண்ணார்”
படம் முழுக்க சிகப்பு பின்னணி வருகிறதே? இதன்,பின்னணி என்ன?
“படப்பிடிப்பு துவங்குவதற்கு முன்னரே, ‘எனக்கு தயவு செஞ்சி கலர்ஃபுல்லா கொடுத்துடாதீங்க. படத்தோட நிறம் ரசிகர்களுடன் கனெக்ட் பண்ணனும். ஒரு ராவான படமா ஆடியன்ஸுக்கு ஃபீல் ஆகணும். படத்தின் வண்ணத்துக்கும் கதைக்கும் ரசிகர்களின் மனநிலைக்கும் ஒன்றாக இருக்கவேண்டும் என்று ஒளிப்பதிவாளரிடம் முன்னரே சொல்லிவிட்டேன். ’வீரமே வாகை சூடும்’ ஒரு கோபம் நிறைந்த படம். அதனால், சிகப்பு நிறத்தைக் கொண்டுவந்தோம்”.
சில காட்சிகளில் விஷால் வெய்ட் போட்டமாதிரி தனித்து தெரிகிறாரே?
“உண்மைதான். ஆனால், அதுக்குக் காரணம், விஷால் சார் இல்லை. கொரோனா ஊரடங்குதான். நடிகர்களின் ஒவ்வொரு நாளும் மிக முக்கியமானது. இந்த நாளிலிருந்து, இந்தநாள் வரை ஒரு படத்தை முடிக்கவேண்டும் என்று திட்டத்துடன் உடம்பைக் கட்டுக்குள் வைத்திருப்பார்கள். ஆனால், கொரோனாவால் எங்கள் படப்பிடிப்பு தள்ளிப் போனது. அதற்குள், விஷால் சார் ஏற்கனவே ஒப்பந்தம் ஆகியிருந்த ’லத்தி’ படத்திற்கு தேதிகள் ஒதுக்கியிருந்ததால், அதில் நடிக்கவேண்டிய சூழல் வந்துவிட்டது. அந்தப் படப்பிடிப்பு சூழலுக்கும் கதைக்காகவும் உடம்பு கொஞ்சம் ஏற்றியிருந்தார். அந்தப் படத்திற்கு அவர் ஒதுக்கியிருந்த தேதிகளை வீணாக்க விரும்பவில்லை. அப்படி வீணாக்கினால் பலரும் பாதிக்கப்படுவார்கள். அதனால், அந்தப் படத்தில் நடித்துவிட்டு ’வீரமே வாகை சூடும்’ பாடல் காட்சிக்கு வந்து வந்து நடித்துக்கொடுத்தார். இப்படி கால சூழலில் நடந்த விஷயம் அது. அதில்தான், சின்ன சேஞ்ச் ஓவர்”.
