வருகிறது `ஜனநாயகன்' முதல் சிங்கிள், பாடியிருப்பது விஜய் தானா...? | Jana Nayagan | Vijay
விஜய் நடிப்பில் ஹெச் வினோத் இயக்கத்தில் உருவாகிவரும் படம் `ஜனநாயகன்'. விஜயின் கடைசி படமாக உருவாகி வரும் இப்படத்தின் மீது பெரிய எதிர்பார்ப்பு உள்ளது. பூஜா ஹெக்டே, மமிதா பைஜு, ப்ரியாமணி, பிரகாஷ் ராஜ், பாபி தியோல், கௌதம் மேனன் எனப் பலரும் இப்படத்தில் நடித்துள்ளனர். சத்யன் சூர்யன் ஒளிப்பதிவு செய்துள்ள இப்படத்திற்கு அனிருத் இசையமைத்துள்ளார். பொங்கல் வெளியீடாக ஜனவரி 9ம் தேதி இப்படம் வெளியாகவுள்ளது.
இப்படத்தின் தலைப்பு மற்றும் ஃபர்ஸ்ட் லுக் போஸ்டர்கள் குடியரசு தினம் அன்று வெளியிடப்பட்டது. அதனைத் தொடர்ந்து விஜய் பிறந்தநாளை முன்னிட்டு கடந்த ஜூன் 22ம் தேதி படத்தின் க்ளிம்ப்ஸ் வீடியோ வெளியிடப்பட்டது. இந்தப் படம் தெலுங்கில் பாலகிருஷ்ணா நடித்து வெளியான `பகவத் கேசரி' ரீமேக் எனவும் சொல்லப்படுகிறது. அந்த ஊகத்திற்கு ஏற்ப, பகவத் கேசரி படத்தைப் போலவே வெளியான டீசரில் போலீஸ் உடையிலும் மற்றும் போஸ்டர்களில் சாமானியன் என இரு தோற்றங்களில் விஜய் இருந்தார். இதற்கடுத்து இப்படத்தின் அப்டேட் எதுவும் வெளியாகாமல் இருந்தது.
கரூர் துயர சம்பவத்திற்கு முன்பு வரை, ஜனநாயகன் பட ஃபர்ஸ்ட் சிங்கிள் தீபாவளிக்கு வர இருப்பதாக சொல்லப்பட்டது. கரூர் துயரத்தில் பாதிக்கப்பட்டவர்களை சந்தித்த பின்பு தான் `ஜனநாயகன்' சம்பந்தமான புரமோஷன் வேலைகளை துவங்க வேண்டும் என இருந்தார் விஜய். அவர்களை சந்தித்து விட்டார் என்பதால், இந்த வாரம் `ஜனநாயகன்' முதல் சிங்கிள் வரும் என தகவல்கள் வந்தன.
இப்போது அதனை உறுதி செய்துள்ளது தயாரிப்பு நிறுவனமான KVN. முதலில் `ஜனநாயகன்' படத்தின் புதிய போஸ்டர் ஒன்றை வெளியிட்டனர். இதில் மக்கள் அனைவரும் விஜயை அரவணைத்தது போல இருந்த புகைப்படம் இடம்பெற்றிருந்தது. தொடர்ந்து `ஜனநாயகன்' பட முதல் சிங்கிள் நவம்பர் 8ம் தேதி வெளியாகும் என அறிவிக்கப்பட்டுள்ளது. The Greatest of All Time படத்தில் `விசில் போடு', லியோ படத்தில் `விசில் போடு', வாரிசு படத்தில் `ரஞ்சிதமே' என சமீபத்தில் இதற்கு முன்பு வெளியான விஜய் படங்கள் அனைத்திலும் முதல் சிங்கிளாக விஜய் பாடிய பாடலே வெளியானது. எனவே இம்முறையும் விஜய் பாடிய பாடலா என எதிர்பார்ப்பு எழுந்துள்ளது. இன்னும் சொல்லப்போனால் சில மாதங்கள் முன்பு, `ஜனநாயகன்' பட முதல் சிங்கிள் விஜய் பாடியுள்ளார் எனவும் பாடலின் பெயர் `தளபதி கட்சேரி' எனவும் சொல்லப்பட்டது. அது உண்மையாக இருந்தால், விஜய் குரலில் முதல் சிங்கிள் வரலாம்.
