துல்கர் சல்மான் ஹீரோவாக நடிக்கும் படம், ’சோலோ’. தீப்தி, தன்ஷிகா, நேகா சர்மா உட்பட பலர் நடிக்கின்றனர். ’டேவிட்’ பிஜாய் நம்பியார் இயக்குகிறார். ரெஃபெக்ஸ் என்டர்டெயின்மென்ட் நிறுவனம் சார்பாக, அனில் ஜெயின், கெட் அவே ஃபிலிம்ஸ் உடன் இணைந்து தயாரித்திருக்கும் இந்தப் படத்தின் பத்திரிகையாளர் சந்திப்பு சென்னையில் நேற்று நடந்தது.
தமிழ், மலையாளத்தில் உருவாகியிருக்கும் இந்தப்படம் பற்றி துல்கர் சல்மான் பேசும்போது, ’நான் லக்கியா இருந்திருக்கேன். என்னோட பிறந்தநாளுக்கு இப்படியெல்லாம் பண்றது ஒரு மாதிரியா இருக்கு. பயமா இருக்கு. இது பெரிய விஷயம். இந்தப் படம் இரண்டு மொழியில உருவாகி இருக்கு. இரண்டு மொழிகள்ல படம் பண்றது 8 படம் பண்றதுக்கு சமம். ஒவ்வொரு ஷாட்ல இருந்து எல்லாத்தையும் இரண்டு மொழிக்கும் வேற வேற மாதிரி பண்ணியிருக்கோம். நான் தமிழ்ல நடிச்ச மூணு படத்துக்கான விழாவுலயும் மணிரத்னம் சார் வந்திருக்கார். அவருக்கு நன்றி’ என்றார்.
இயக்குனர் மணிரத்னம், ஒளிப்பதிவாளர் ராஜீவ் மேனன் உட்பட பலர் கலந்துகொண்டனர். இந்த படத்தில் 3 ஒளிப்பதிவாளர்கள், 11 இசையமைப்பாளர்கள் பணியாற்றியுள்ளனர். 15 பாடல்கள் இடம்பெற்றிருக்கிறதாம்.
