‘தர்பார்’ படம் மிகப்பெரிய வெற்றியடைய வாழ்த்துகள் என நடிகர் சிவகார்த்திகேயன் தெரிவித்துள்ளார்.
ஏ.ஆர்.முருகதாஸ் இயக்கத்தில் ரஜினிகாந்த் நடித்திருக்கும் தர்பார் திரைப்படத்தில் நயன்தாரா நாயகியாகவும், சுனில் ஷெட்டி எதிர்மறை கதாபாத்திரத்திலும் நடித்துள்ளனர். ரஜினியின் மகளாக நிவேதா தாமஸ் நடித்திருக்கிறார். இவர்கள் தவிர, யோகிபாபு, தம்பி ராமையா, ஸ்ரீமன் உள்ளிட்ட பலரும் நடித்திருக்கின்றனர்.
இப்படம் தமிழ், தெலுங்கு, இந்தி ஆகிய மூன்று மொழிகளில் உலகம் முழுவதும் 7ஆயிரம் திரையரங்குகளில் வெளியிடப்பட்டுள்ளது. இந்தியாவில் மட்டும் சுமார் 4 ஆயிரம் திரை அரங்குகளில் படம் வெளியாகி உள்ளது. தமிழ்நாட்டில் இன்று அதிகாலையிலேயே சிறப்புக் காட்சிகளை திரையிட மாநில அரசு அனுமதி வழங்கியதால், திரை அரங்குகளில் ரசிகர்களின் கூட்டம் அலைமோதியது. படம் குறித்து நேர்மறையான விமர்சனங்களை மக்கள் வைத்து வருகின்றனர்.
இந்நிலையில், நடிகர் சிவகார்த்திகேயன் தனது ட்விட்டர் பக்கத்தில் தர்பார் படம் குறித்து பதிவிட்டுள்ளார். அதில், “தர்பார்... ஒன் மேன் ஷோ... அவருடைய ஆற்றல், அவரது ஸ்டைல், அவரது வசீகரம் எப்போதும் ஊக்கமளிக்கிறது. ரஜினிகாந்த், ஏ.ஆர். முருகதாஸ், அனிருத், நயன்தாரா மற்றும் மொத்த குழுவுக்கும் படம் மிகப்பெரிய வெற்றியடைய வாழ்த்துகள்.” எனத் தெரிவித்துள்ளார்.
