பார்வையற்ற பாடகி வைக்கம் விஜயலட்சுமி -அனூப் திருமணம் நேற்று நடந்து. மணமக்களுக்கு ஏராளமானோர் வாழ்த்துகளை தெரிவித்து வருகின்றனர்.
பிருத்விராஜ் நடித்த ’ஜே.சி.டேனியல்’ படத்தில் இடம்பெற்ற ’காற்றே காற்றே’ என்ற பாடல் மூலம் பாடகியாக அறிமுகமானவர் மலையாள பாடகி, வைக்கம் விஜயலட்சுமி. பார்வையற்றவரான இவர், அடுத்து ’வீர சிவாஜி’ படத்தில் ’சொப்பன சுந்தரி நான் தானே’, ’என்னமோ ஏதோ’ படத்தில் ’புதிய உலகை புதிய உலகை’ உட்பட தமிழில் பல பாடல்களை பாடியுள்ளார்.
தமிழ், மலையாளத்தில் தனது வித்தியாசமான குரல் மூலம் பிரபலமான இவரது வாழ்க்கை கதை சினிமாவாகிறது. இதை விஜயகுமார் இயக்குகிறார். விஜயலட்சுமியாக, மீன் விற்றுப் படிக்கும் மாணவி ஹனன் ஹமீது நடிக்கிறார்.
இந்நிலையில் விஜயலட்சுமிக்கும் சந்தோஷ் என்பவருக்கும் திருமணம் செய்ய முடிவு செய்யப்பட்டு கடந்த வருடம் நிச்சயதார்த்தம் நடை பெற்றது. கருத்துவேறுபாடு காரணமாக தனது திருமணம் நின்றுவிட்டதாக வைக்கம் விஜயலட்சுமி தெரிவித்திருந்தார்.
இந்நிலையில் மிமிக்ரி கலைஞர் அனூப் என்பவருக்கும் விஜயலட்சுமிக்கும் திருமணம் செய்ய முடிவு செய்யப்பட்டது. அனூப், இன்டீரியர் டெக்கரேஷன் கான்ட்ராக்டராகவும் இருக்கிறார். இவர்கள் திருமண நிச்சயதார்த்தம் விஜயலட்சுமியின் வீட்டில் கடந்த மாதம் நடந்தது. திருமணம், வைக்கம் மகாதேவ கோயிலில் நேற்று காலை நடந்தது.
இதில் பாடகர் யேசுதாஸ், அவர் மனைவி பிரபா, விஜய் யேசுதாஸ், இசை அமைப்பாளர் எம்.ஜெயச்சந்திரன், மூத்த கம்யூனிஸ்ட் தலைவர் பன்னியன் ரவீந்திரன் உட்பட பலர் நேரில் சென்று மணமக்களை வாழ்த்தினர். திரையுலகினர் மட்டுமின்றி பொதுமக்களும் கூடி மணமக்களை வாழ்த்தினர். சமூகவலைத்தளங்களிலும் நடிகை மஞ்சுவாரியர் உட்பட ஏராளமான திரை பிரபலங்கள் அவருக்கு வாழ்த்துகளை தெரிவித்து வருகின்றனர்.
