ரூ.100 கோடி வசூலித்த மண்டாடி.. வரலாறு படைத்த சூரி! டாப் 5 லிஸ்ட்டில் இடம்!

இயக்குநர் மதிமாறன் இயக்கத்தில் சூரியின் நடிப்பில் வெளிவந்திருக்கும் மண்டாடி திரைப்படம், மீனவர்களின் வாழ்க்கையையும் அவர்களுக்கிடையே நடைபெறும் படகுப்போட்டியையும் மையமாக கொண்டு வெளியானது. சூரியுடன் மகிமா, சுஹாஸ், சத்யராஜ் உள்ளிட்ட பல திரை நட்சத்திரங்கள் நடித்திருக்கும் இப்படத்திற்கு ஜிவி பிரகாஷ் இசையமைத்துள்ளார். கடல் விளையாட்டு, விறுவிறுப்பான திரைக்கதை, பின்னணி இசை, கேமரா ஒர்க் என அனைத்தும் ஒன்று சேர்ந்து ஒரு தியேட்டர் விருந்தாக களமிறங்கிய மண்டாடியை பெருவாரியான ரசிகர்கள் கொண்டாடிவருகின்றனர்.

இத்திரைப்படம் சூரியின் திரைவாழ்க்கையில் ஒரு மிகப்பெரிய மைல்கல் திரைப்படமாக மாறியுள்ளது. இதற்குபிறகு சூரியை ‘மண்டாடி சூரி’ என அழைத்தாலும் மிகைப்படுத்துவதற்கில்லை. அந்தவகையில் படம் வசூலில் பட்டையை கிளப்பி வருகிறது.

கடந்த 10ஆம் தேதி தமிழ் மற்றும் தெலுங்கு மொழிகளில் வெளியான மண்டாடி திரைப்படம், 12ஆம் நாளில் காலடி எடுத்துவைத்துள்ளது. இரண்டாம் வார இறுதியில் இந்திய அளவில் நிகர வசூலாக ரூ. 75.55 கோடியை வசூலித்துள்ளது. இதன் இந்திய மொத்த வசூல் ரூ.88.32 கோடியாக உயர்ந்துள்ளது. மேலும் இப்படம் ஞாயிற்றுக்கிழமை அன்று வெளிநாட்டு சந்தைகளில் இருந்து ரூ. 75 லட்சத்தை ஈட்டியுள்ளது. இதன் மொத்த வெளிநாட்டு வசூல் ரூ. 15.40 கோடியை எட்டியுள்ளது. இதன் மூலம் இந்தியா மற்றும் வெளிநாடு இரண்டையும் சேர்த்து உலகளாவிய மண்டாடி திரைப்படத்தின் மொத்த வசூல் ரூ. 103.72 கோடியாக உயர்ந்துள்ளது. இது சூரியின் திரை வாழ்க்கையில் வசூலில் சதமடிக்கும் முதல் திரைப்படமாகும். இதன்மூலம் 100 கோடி வசூல் கொடுத்த தமிழ் நடிகர்களில் பட்டியலில் தன் பெயரையும் சேர்த்துள்ளார் சூரி.

இதற்கிடையில், மண்டாடியுடன் வெளிவந்த கார்த்தியின் 'சர்தார் 2' திரைப்படம் உலகளவில் வெறும் ரூ.23.55 கோடியை மட்டுமே வசூலித்து மிகப்பெரிய பின்னடைவை சந்தித்துள்ளது. அதேநேரத்தில் 100 கோடியை வசூலித்திருக்கும் சூரியின் மண்டாடி திரைப்படம், இந்த வருடம் வெளியாகி இந்திய அளவில் அதிக வசூல் செய்த தமிழ் திரைப்படங்கள் பட்டியலில் டாப் 5 லிஸ்ட்டில் இடம்பிடித்துள்ளது.