'Maa Vande' | பிரதமர் மோடியின் பயோபிக்.. உன்னி முகுந்தன் நடிப்பில் வெளியான புது அப்டேட்!

பிரதமர் மோடியின் சிறுவயது முதல் தேசத்தின் தலைவரான வரலாற்றையும், உண்மைச் சம்பவங்களையும் அடிப்படையாகக் கொண்டு அவருடைய பயோபிக் பிரம்மாண்டமாக தயாராகி வருகிறது. இந்த நிலையில், அவரது பிறந்தநாளையொட்டி இன்று படத்தின் ஃபர்ஸ்ட் லுக் மற்றும் `மா வந்தே' என்ற தலைப்பும் வெளியிடப்பட்டுள்ளது. குறிப்பாக, மோடிக்கு எப்போதும் ஆதரவாக இருந்த அவரின் தாயார் ஹீராபென் மோடியுடனான ஆழமான பந்தத்தை இத்திரைப்படம் பதிவு செய்ய உள்ளது.

இப்படத்தில் நரேந்திர மோடியாக பிரபல மலையாள நடிகர் உன்னி முகுந்தன் நடிக்கிறார். படத்திற்கு `கேஜிஎஃப்', `சலார்' போன்ற படங்களுக்கு இசையமைத்த ரவி பஸ்ரூர் இசையமைக்க, `நான் ஈ', `பாகுபலி', `RRR' போன்ற படங்களுக்கு ஒளிப்பதிவு செய்த கே.கே.செந்தில் குமார் ஒளிப்பதிவு செய்கிறார். கிராந்தி குமார் இயக்கும் இப்படம் சர்வதேச தரத்திலும், VFX தொழில் நுட்பங்களுடனும், இந்தியாவின் முன்னணி நுட்ப நிபுணர்களின் பங்களிப்புடனும் உருவாக்கப்படுகிறது. பான்-இந்தியா அளவில் இந்திய மொழிகள் அனைத்திலும் வெளியீடு செய்யப்படுவதோடு, ஆங்கிலத்திலும் தயாரிக்கப்படுகிறது.

இதற்கு முன்பு மோடியின் குழந்தைப் பருவத்தை மையமாக வைத்து `Chalo Jeete Hain' என்ற குறும்படம் 2018ல் வெளியானது, அரசியல் வாழ்க்கையை மையமாகக் கொண்டு விவேக் ஓபராய் நடிப்பில் `PM Narendra Modi' படம் 2019இல் வெளியானது. அதே ஆண்டில் அவரது இளமைக்கால வாழ்க்கையை மையமாக வைத்து `Modi: Journey of a Common Man' என்ற வெப் சீரிஸ் வெளியானது. இவற்றைத் தொடர்ந்து இப்போது `Maa Vande' படத்தில் மோடியின் ஆரம்ப காலம் மற்றும் அம்மாவுடனான அவரது பாசத்தை பற்றிச் சொல்ல இருக்கின்றனர்.