ஜெயிலர் 2| மழையிலும் நிரம்பிவழியும் தியேட்டர்.. 6 நாளில் பிரமாண்ட வசூல்!
ரஜினிகாந்த் நடிப்பில் உருவான 'ஜெயிலர் 2' திரைப்படம், 6 நாட்களில் ரூ.541 கோடி வசூலித்து, தமிழ்த் திரையுலகில் அதிக வசூலித்த படங்களின் பட்டியலில் இடம்பிடித்துள்ளது. 5 மொழிகளில் வெளியான இப்படம், குடும்பத்துடன் பார்க்கும் வகையில் உருவாக்கப்பட்டு, ரசிகர்களிடையே பெரும் வரவேற்பைப் பெற்றுள்ளது.
ரஜினி நடிப்பில் நெல்சன் திலீப்குமார் இயக்கத்தில் உருவாகியிருக்கும் திரைப்படம் ஜெயிலர் 2. 2023ஆம் ஆண்டு வெளியாகி ஹிட்டடித்த ஜெயிலர் படத்தின் இரண்டாம் பாகமாக உருவாகியிருக்கும் இப்படத்தில், மோகன்லால், சிவராஜ் குமார், எஸ்ஜே சூர்யா, ஜாக்கி ஷரஃப், ரித்திக் ரோஷன், ரம்யா கிருஷ்ணன், வித்யா பாலன், யோகிபாபு, சுராஜ், நமோநாரயணா உள்ளிட்ட பல திரைநட்சத்திரங்கள் நடித்துள்ளனர்.
கடந்த அக்டோபர் 15ஆம் தேதி உலகம் முழுவதும் 5 மொழிகளில் வெளியான இத்திரைப்படம், நேர்மறையான விமர்சனத்தை பெற்று வெற்றிகரமாக ஓடிவருகிறது. காமெடி + ஆக்சன் பாணியில் உருவாக்கப்பட்டிருக்கும் ஜெயிலர் 2, குடும்பமாக பார்த்து மகிழும் வகையில் பழைய ரஜினிபடம் போல உருவாக்கப்பட்டுள்ளது. இது வசூலிலும் சாதனையை நிகழ்த்தி வருகிறது.
இந்தசூழலில் தான் 6 நாளில் இப்படம் ரூ.541 கோடி வசூலித்திருப்பதாக தகவல் வெளியாகியுள்ளது. இந்திய அளவில் 300 கோடியையும், வெளிநாடுகளில் 200 கோடி வசூலையும் ஜெயிலர் 2 கடந்துள்ளது. முதல் வார இறுதியில் அதிக வசூல் செய்த தமிழ்த் திரைப்படமாக ஜெயிலர் 2 சாதனை படைத்துள்ளது. 5வது நாள் வசூலைவிட 6வது நாளின் வசூல் 7% அதிகரித்திருப்பது படத்திற்கான பெரிய பாசிட்டிவாக பார்க்கப்படுகிறது. கூலி படத்தின் வசூலை முறியடித்திருக்கும் ஜெயிலர் 2, தமிழ்சினிமாவில் அதிக வசூலித்த டாப் 5 படங்களுக்குள் நுழைந்துள்ளது. இந்தப்பட்டியலில் 4 படங்கள் ரஜினி படங்கள் என்பது குறிப்பிடத்தக்கது.
