ட்விட்டரில் வெளியான அக்சய்குமாரின் ‘கோல்ட்’ போஸ்டர்

பாலிவுட் நடிகர் அக்சய் குமார் நடிப்பில் வெளியாக இருக்கும் ‘கோல்ட்’ திரைப்படத்தின் போஸ்டர் வெளியிடப்பட்டுள்ளது. 

பாலிவுட் சூப்பர் ஸ்டார்களில் முக்கியமானவர் அக்சய் குமார். நல்ல கதையம்சம் கொண்ட பாத்திரங்களை தேடி நடித்து வரும் அக்சய் குமார், பேட்மேன் என்ற படத்தில் நடித்திருந்தார். தமிழகத்தைச் சேர்ந்த முருகானந்தம் என்பவர் குறைந்த விலையில் எப்படி சானிடரி நாப்கின் தயாரிப்பது என்ற காதாபாத்திரத்தில் தத்ரூபமாக தன் நடிப்பை வெளிபடுத்தி இருந்த அக்சய், தமிழில் ரஜினி நடிக்கும் ‘2.0’ படத்திலும் முக்கியமான கதாபாத்திரத்தில் நடித்து வருகிறார். இந்நிலையில்தான் ஹாக்கி விளையாட்டை மையமாக கொண்டு எடுக்கும் படத்தின் போஸ்டரை தன்னுடைய ட்விட்டர் பக்கத்தில் வெளியிட்டுயிருகிறார். 

ஹாக்கி விளையாட்டை மையமாக வைத்து எடுக்கப்பட்ட திரைப்படத்தில் அக்சய் குமார், நாகினி சீரியல் புகழ் மவுனி ராய் உள்ளிட்ட நட்சத்திரங்கள் நடித்துள்ளனர். 1948 ஆம் ஆண்டு ஒலிம்பிக் போட்டியில் இந்திய அணி தங்கம் வென்றதை பின்னணியாக வைத்து இயக்குனர் ரீமா கக்தி திரைப்படமாக்கியுள்ளார். ஆகஸ்ட் 15ஆம் தேதி இத்திரைப்படம் வெளியாக இருக்கும் நிலையில் இதன் முதல் போஸ்டரை படத்தின் நாயகன் அக்சய் குமார் ட்விட்டரில் வெளியிட்டுள்ளார்.