‘ஆரண்ய காண்டம்’ படத்தின் இயக்குனர் தியாகராஜன் குமாரராஜாவின் ‘சூப்பர் டீலக்ஸ்’ படத்தின் ஃபர்ஸ்ட் லுக் அக்டோபர் 8ம் தேதி வெளியாகும் என அதிகாரப்பூர்வ அறிவிப்பு வெளியாகியுள்ளது.
நடிகர் விஜய் சேதுபதி நடிக்க ‘ஆரண்யக் காண்டம்’ படத்தின் இயக்குனர் தியாகராஜன் குமாரராஜா இயக்கி வரும் படம் ‘சூப்பர் டீலக்ஸ்’. இந்தப் படத்தில் விஜய் சேதுபதி, ஷில்பா என்ற பெயரில் திருநங்கையாக நடித்துள்ளார் எனக் கூறப்படுகிறது. மேலும் இந்தப் படத்தில் மலையாள படத்தின் முன்னணி ஹீரோ ஃபகத் ஃபாசில், நடிகைகள் சமந்தா, ரம்யா கிருஷ்ணன், காயத்ரி, இயக்குனர் மிஷ்கின் உட்பட பலர் நடித்துள்ளனர். இந்தப் படத்திற்கு யுவன் ஷங்கர் ராஜா இசையமைத்துள்ளார்.
‘ஆரண்ய காண்டம்’ திரைப்படத்தின் மூலம் அனைவரின் கவனத்தை ஈர்த்த தியாகராஜன் குமாரராஜா இரண்டாவது திரைப்படம் என்பதால் இந்தப் படத்திற்கு பெரிய எதிர்பார்ப்பு எழுந்துள்ளது. இந்நிலையில் பெண் வேடத்தில் வெளியான விஜய் சேதுபதியின் படத்தை சமூக வலைத்தளங்களில் ரசிகர்கள் கொண்டாடி தீர்த்தனர். அடுத்தடுத்து விஜய் சேதுபதியின் படம் வெளியாகி வந்த நிலையில் ‘சூப்பர் டீலக்ஸ்’ படம் குறித்த தகவலுக்கு ரசிகர்கள் காத்திருந்தனர். இந்நிலையில் ‘சூப்பர் டீலக்ஸ்’ குறித்த செய்தியை நடிகர் விஜய் சேதுபதி தனது ட்விட்டர் பக்கத்தில் பகிர்ந்துள்ளார்.
அதில் ''ஒரு வழியா, கடைசியா, செமயா, சூப்பரா எனக்கு ரொம்ப பிடிச்ச இயக்குநர் தியாகராஜன் குமாரராஜாவின் ‘சூப்பர் டீலக்ஸ்’ படத்தோட பர்ஸ்ட் லுக் அக்டோபர் 8ம் தேதி ரிலீஸ் ஆகுது'' எனத் தெரிவித்துள்ளார்.
‘சூப்பர் டீலக்ஸ்’ படத்தின் இந்த அதிகாரப்பூர்வ அப்டேட்டை ரசிகர்கள் கொண்டாடி வருகின்றனர்
