கடந்த மாதம் 14ஆம் தேதி மும்பையில் உள்ள பிரபல பாலிவுட் நடிகர் சல்மான் கான் வீட்டருகே அதிகாலை நேரத்தில் கண்மூடித்தனமான துப்பாக்கிச்சூடு சம்பவம் ஒன்று நடைபெற்றது. இரு சக்கர வாகனத்தில் வந்த இருவர் இத்தாக்குதலை நடத்தினர்.
இதையடுத்து துப்பாக்கிச்சூடு நடத்திய இருவரும் கைது செய்யப்பட்ட நிலையில் துப்பாக்கியை தந்து உதவிய புகாரில் அனுஜ் தாப்பன் என்பவர் கைது செய்யப்பட்டார். அவர் தொடர்ந்து காவல்துறை விசாரணையில் இருந்தார். அதில் மும்பை காவல் ஆணையர் அலுவலக லாக்கப்பில் அவர் இருந்த போது தற்கொலை முயற்சியில் ஈடுபட்டார்.
உடனடியாக அவரை மருத்துவமனைக்கு காவல்துறையினர் அழைத்துச் சென்ற நிலையில், அங்கு அவருக்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி நேற்று அவர் உயிரிழந்தார்.
தற்கொலை எதற்கும் தீர்வல்ல. மன அழுத்தம் ஏற்பட்டாலோ, தற்கொலை எண்ணம் வந்தாலோ, அதில் இருந்து விடுபடுவதற்கு தமிழக சுகாதார சேவை உதவி மையம் - 104, சினேகா தற்கொலை தடுப்பு உதவி மையம் - 044-24640050 ஆகிய எண்களை அழைக்கலாம்.
