கமல்ஹாசனின் அண்ணன் சாருஹாசனின் மகள் அனுஹாசன் மறுபடியும் நடிக்க வருகிறார்.
அனுஹாசன் ‘இந்திரா’ படத்தின் மூலம் பரவலாக அறியப்பட்டார். திருமணத்திற்குப் பிறகு லண்டனில் செட்டில் ஆகியிருந்தார். அவ்வபோது சமயம் கிடைக்கும் போது தமிழ்நாட்டுக்கு வந்து டிவி ஷோக்களில் மட்டும் தொகுப்பாளினியாக பணியாற்றிக் கொண்டிருந்தார். இவர் தொகுத்து வழங்கிய ‘காஃபி வித் அணு’ ரசிகர்கள் மத்தியில் இவருக்குத் தனி அடையாளத்தை ஏற்படுத்தி தந்தது.
லண்டன் வாழ்க்கையில் இருந்து திரும்பி இருக்கும் அனுஹாசன் மீண்டும் நடிக்க முடிவெடுத்திருப்பதாக கூறி இருக்கிறார். அதோடு இனி இந்தியாவிலேயே தங்கிவிடப் போவதாகவும் கூறியுள்ளார். டிவி நிகழ்ச்சிகளில் ஏற்கெனவே அனுபவம் பெற்ற இவரிடம் அவரது சித்தப்பா கமஹாசன் தொகுத்து வழங்கும் பிக் பாஸ் எப்படி இருக்கிறது? பார்த்தீர்களா? என கேட்டதற்கு “டிவி பார்க்கவே நேரம் இல்லை. விரைவில் பார்த்துவிடுவேன். இனிமேல் எங்க போகப் போகிறேன். சென்னையில் தானே இருக்கப் போகிறேன்” என ஸ்வீட்டாக பதில் சொல்கிறார் அனுஹாசன்.
அனுஹாசன் அமெரிக்காவில் இருந்த போது அங்கே எடுக்கப்பட்ட வல்லதேசம் என்ற படத்தில் அனுஹாசன் நடித்துள்ளார். அந்தப் படம் விரைவில் திரைக்கு வர இருக்கிறது. இந்த நிலையில் இனி இங்கேயே தங்கி தொடர்ந்து படங்களில் நடிக்கப் போவதாக அனுஹாசன் கூறியிருக்கிறார்.
