‘முதலமைச்சர் ஸ்டாலினின் வாழ்க்கை வரலாற்றை படமாக எடுத்தால் நடிப்பீர்களா?’ - நடிகர் விஜய் சேதுபதி சொன்ன பதில்!

தமிழ்நாடு முதலமைச்சர் மு.க.ஸ்டாலின் பிறந்தநாள் கொண்டாட்டத்தின் ஒரு பகுதியாக மதுரை திருப்பாலை மேனேந்தல் பகுதியில் அவரின் 70 ஆண்டு கால வாழ்க்கை வரலாற்றை எடுத்துக்கூறும் வகையில் புகைப்பட கண்காட்சி கடந்த 19ம் தேதி தொடங்கி 12 நாட்கள் நடைபெற்றன.

முன்னதாக புகைப்பட கண்காட்சியை பார்வையிட வந்த நடிகர் விஜய் சேதுபதியை வரவேற்க ஏராளமான பொதுமக்களும் அவரது ரசிகர்களும் கூடினர்.

நடிகர் விஜய் சேதுபதி, அமைச்சர் மூர்த்தியுடன் புகைப்படக் கண்காட்சியை பார்வையிட்டார். அதில் மிசா காலகட்டத்தில் சிறையில் முதல்வர் ஸ்டாலின் அனுபவித்த கொடுமைகளை காட்சிப்படுத்தும் அரங்கையும் அவர் பார்வையிட்டார்.

இதையடுத்து செய்தியாளர்களிடம் நடிகர் விஜய்சேதுபதி பேசுகையில், ''முதல்வர் ஸ்டாலினின் 70 ஆண்டு கால புகைப்பட கண்காட்சியை பார்க்கும் போது நம்மை ஆண்டவர்கள் பற்றி தெரிய வருகிறது. கண்காட்சியை பார்க்கும் ஆயிரக்கணக்கான மாணவர்களுக்கு முதலமைச்சர் குறித்த புரிதல் ஏற்படும். நம் முதலமைச்சர் 70 ஆண்டு கால அரசியலில் எப்படி முன்னுக்கு வந்தார் என்பதை தெரிந்து வைத்துக் கொள்வது அவசியம்” என்றார்.

தொடர்ந்து அமைச்சர் மூர்த்தி புகைப்பட கண்காட்சி குறித்து செய்தியாளர்களுக்கு பேட்டி அளித்தார். அவர் பேசுகையில், “முதல்வரின் புகைப்பட கண்காட்சியை சிறுவர்கள் முதல் பெரியவர்கள் வரை பலரும் ஆர்வமாக பார்வையிட்டனர். 1 லட்சத்திற்கும் மேலானோர் கண்காட்சியை பார்வையிட்டுள்ளனர்” எனக் கூறினார்