பிரேசிலில் மிகவும் இன்ஸ்டா பிரபலமாக திகழ்பவர், ரவேனா ஹன்னிலி. 23 வயதான இவர், 266,000க்கும் அதிகமான பேரை இன்ஸ்டாகிராமில் பின்தொடர்பவர். இந்த நிலையில், அவர் ஹைமனோபிளாஸ்டி அறுவைச்சிகிச்சை செய்ய இருப்பதாக தெரிவித்துள்ளார். இதற்காக அவர், 19,000 டாலர்கள் (இந்திய மதிப்பில் ரூ.16 லட்சத்துக்கும் மேல்) செலவு செய்ய உள்ளார். இந்த அறுவைசிகிச்சையை தனது சுயமரியாதையை மீட்டெடுக்கவும் மற்றும் அவரது தனிப்பட்ட மற்றும் தொழில் வாழ்க்கையில் ஒரு புதிய அத்தியாயத்தைத் தொடங்குவதற்கான ஒரு வழியாகவும் கருதுகிறார்.
இதுகுறித்து அவர், “நான் மீண்டும் கன்னியாக மாற விரும்புகிறேன். இது ஒரு பெண் எப்படி உணர்கிறாள் மற்றும் அவள் தனக்காக எதை விரும்புகிறாள் என்பதைப் பற்றியது. இது எனது சுயமரியாதை மற்றும் ஆழ்ந்த தனிப்பட்ட காரணங்களைப் பற்றியது. துரதிர்ஷ்டவசமாக, இதுபோன்ற நெருக்கமான தேர்வுகளை அனைவரும் புரிந்துகொள்வதில்லை அல்லது ஆதரிப்பதில்லை. அவற்றிலிருந்து விலகி, நாம் தனிப்பட்ட முடிவுகளை மதிக்கத் தொடங்க வேண்டும்” எனத் தெரிவித்துள்ளார்.
ஆனால், அவருடைய இந்த அறிவிப்புக்கு மருத்துவர்கள் பலரும் கவலை தெரிவித்துள்ளனர். லண்டனை தளமாகக் கொண்ட மெடிசனல் கிளினிக்கின் தலைமை நிர்வாக அதிகாரி டாக்டர் ஹனா சலுசோலியா, ”இது ஓர் ஒப்பனை செயல்முறையாக அங்கீகரிக்கப்பட்டாலும், கன்னித்தன்மையை மீட்டெடுக்காது. மேலும் இதன்மூலம் தொற்று, தழும்புகள் மற்றும் ஒழுங்கற்ற குணமடைதல் போன்ற அபாயங்கள், முடிவுகளில் அதிருப்தி ஏற்படுவதற்கான சாத்தியக்கூறுகள் உள்ளன” எனத் தெரிவித்துள்ளார். அதேநேரத்தில், வெற்றிகரமான ஹைமனோபிளாஸ்டி அறுவைச்சிகிச்சைக்குப் பிறகு பெரும்பாலான பெண்கள் தங்கள் முதல் உடலுறவின்போது கன்னித்திரை கிழிந்து ரத்தம் கசிதலை உணர்ந்ததாகத் தெரிவித்துள்ளனர்.
என்றாலும், ஹன்னிலி இந்த முடிவில் உறுதியாக இருப்பதாகத் தெரிவித்துள்ளார். அதேநேரத்தில், அவர் இன்னும் அதற்கான அறுவைச்சிகிச்சை தேதியை இறுதி செய்யவில்லை. அறுவைசிகிச்சைக்குப் பிந்தைய பராமரிப்பு வழிகாட்டுதல்கள், உடல் செயல்பாடுகளைத் தவிர்ப்பது, குணமடையும் காலத்தில் நெருக்கத்தைத் தவிர்ப்பது மற்றும் சரியான குணமடைவதை உறுதிசெய்ய தனது ஆறுதலுக்கு முன்னுரிமை அளிப்பது உள்ளிட்ட அனைத்து சிகிச்சை முறைகளையும் அவர் பின்பற்ற விரும்புகிறார்.
”ஹைமனோபிளாஸ்டி என்பது கருவளையத்தை (கன்னித்திரை) மறுகட்டமைப்பதற்காகச் செய்யப்படும் ஓர் அறுவைச்சிகிச்சை ஆகும். கருவளையம் என்பது பெண்ணின் பிறப்புறுப்புக்குள் இருக்கும் மெல்லிய சளி சவ்வு ஆகும். இது ஒரு தடையாக செயல்படுகிறது. பெண்ணின் முதல் உடலுறவின்போது கருவளையம் உடைகிறது அல்லது கீறல் விடுகிறது. இந்த மென்மையான தசை உடைவதால் சிறிது ரத்தம் வரலாம். அதேநேரத்தில் தீவிரமான உடற்பயிற்சிகள், ஜிம்னாஸ்டிக்ஸ், குதிரையேற்றம், நீச்சல், சைக்களிங் போன்றவற்றால்கூட கருவளையம் உடைந்து போகலாம் அல்லது கிழிந்துபோகலாம்” என்கின்றனர் மருத்துவர்கள்.
முன்னதாக, கடந்த ஆண்டு பிரேசில் நாட்டைச் சேர்ந்த ஜூலியா மெடிரோஸ் என்ற 23 வயதான அழகி, இதே அறுவைச்சிகிச்சையைச் செய்திருந்தார் என்பது குறிப்பிடத்தக்கது. முதல்முறையாக பாலுறவு கொள்ளும் இன்பத்தைப் பெறவும், புதிய துணையுடன் வாழவும் விரும்பி, இந்த அறுவைச்சிகிச்சையை செய்ததாக தெரிவித்திருந்தார்.