'ரவுடி படப்பை குணா என்கவுன்ட்டர் செய்யப்படலாம்'- அச்சத்தில் மனைவி தொடர்ந்த வழக்கு தள்ளுபடி

பிரபல ரவுடி படப்பை குணா காவல்துறையினரால் என்கவுன்ட்டர் செய்யப்படலாம் என அச்சம் தெரிவித்து அவரது மனைவி தொடர்ந்த வழக்கை சென்னை உயர்நீதிமன்றம் தள்ளுபடி செய்தது.

காஞ்சிபுரம் மாவட்டம் மதுரமங்கலம் பகுதியை சேர்ந்தவர் படப்பை குணா என்கிற குணசேகரன் மீது கொலை உள்ளிட்ட 42 வழக்குகள் உள்ளன. தலைமறைவாகியுள்ள குணாவை கைது செய்ய காவல்துறை நடவடிக்கை எடுத்து வரும் நிலையில், அவரது மனைவி எல்லம்மாள் சென்னை உயர்நீதிமன்றத்தில் வழக்கு தொடர்ந்துள்ளார்.

தனது கணவர் காவல் அதிகாரியால் என்கவுன்ட்டர் செய்யப்படலாம் என அச்சம் எழுந்துள்ளதாகக் கூறிய அவர், படப்பை குணாவை என்கவுன்ட்டர் செய்யக்கூடாது என காவல்துறைக்கு உத்தரவிடுமாறு கோரிக்கை விடுத்தார்.

குணாவை என்கவுன்ட்டர் செய்யும் திட்டம் எதுவும் இல்லை என்றும், சரணடையும் பட்சத்தில் விதிகளுக்கு உட்பட்டு நடத்தப்படுவார் என காவல்துறை தரப்பில் உறுதி அளிக்கப்பட்டது. இதையடுத்து எல்லம்மாளின் மனுவை சென்னை உயர்நீதிமன்றம் தள்ளுபடி செய்து உத்தரவிட்டது.