“மோடிதான் அதிமுகவின் ரிங் மாஸ்டர்?” - மு.க.ஸ்டாலின்

அதிமுகவிற்கு பிரதமர் மோடி ரிங் மாஸ்டர் போல் செயல்படுவதாக திமுக தலைவர் மு.க.ஸ்டாலின் விமர்சித்துள்ளார்.

நாடு முழுவதும் பெரும் அதிர்வலைகளை ஏற்படுத்திய 2ஜி அலைக்கற்றை ஒதுக்கீடு வழக்கில் ஆ.ராசா, கனிமொழி உள்ளிட்ட அனைவரும் கடந்த ஆண்டு டிசம்பர் மாதம் விடுதலை செய்யப்பட்டனர். குற்றச்சாட்டுகளை சந்தேகத்திற்கு இடமின்றி நிரூபிக்க சிபிஐ தவறிவிட்டதால் ஆ.ராசா உள்ளிட்ட குற்றம்சாட்டப்பட்ட 14 பேரையும் விடுவிப்பதாக டெல்லி சிபிஐ சிறப்பு நீதிமன்ற நீதிபதி அறிவித்தார்.

இதனையடுத்து, சிபிஐ மற்றும் அமலாக்கத்துறை சார்பில் ஆ.ராசா, கனிமொழி உள்ளிட்டோரின் விடுதலையை எடுத்து மேல்முறையீடு செய்தது. இந்த மேல்முறையீடு தொடர்பாக குற்றம்சாட்டப்பட்டவர்கள் தரப்பில் பதிலளிக்க உத்தரவிடப்பட்டிருந்தது. 

இந்நிலையில் தஞ்சையில் நடைபெற்ற திமுக நிர்வாகிகளின் இல்லத் திருமண விழாவில் பங்கேற்று பேசிய மு.க.ஸ்டாலின், பொடா, மிசா என பல வழக்குகளை சந்தித்த தங்களை, முதலமைச்சர் மிரட்டிப் பார்ப்பதாக கூறியுள்ளார். அதிமுக சர்க்கஸ் கூடாரமாக இருப்பதாகவும், ரிங் மாஸ்டராக பிரதமர் ஆட்டுவிப்பதாகவும் ஸ்டாலின் விமர்சித்தார். வழக்குத் தொடுப்பேன் என முதலமைச்சர் எடப்பாடி பழனிசாமி பூச்சாண்டி காட்டுகிறார். மேலும் 2 ஜி விவகாரத்தில் தொடரப்பட்டுள்ள மேல்முறையீடு வழக்குகளை எதிர்கொள்ளத் தயார் எனவும் தெரிவித்துள்ளார்.