#TNElectins2026 | மாற்றம் தேவையில்லை என கூறினாரா அஜித்?

தி.நகரில் தனது வாக்கை செலுத்தினார் இசையமைப்பாளர் இளையராஜா

“தமிழ்நாட்டின் வளர்ச்சிக்குத் தவறாது வாக்களியுங்கள்! 2026 சட்டமன்றத் தேர்தலிலில் எனது வாக்கினைச் செலுத்திவிட்டேன். தமிழ்நாட்டு வாக்காளப் பெருமக்கள் அனைவரும் தவறாமல் தங்கள் ஜனநாயகக் கடமையை ஆற்றிடுங்கள். இன்று நீங்கள் அளிக்கப் போவது வாக்கல்ல; தமிழ்நாட்டைக் காக்க நீங்கள் ஏந்தும் கேடயம்! உங்கள் வாக்குதான் தமிழ்நாட்டிலுள்ள ஒவ்வொருவரின் எதிர்காலத்தையும் தீர்மானிக்கும். ஜனநாயகம் - மதச்சார்பின்மை - மாநில உரிமைகள் - சமத்துவம் - சமூகநீதி ஆகிய அரசியலமைப்பின் உயர்ந்த விழுமியங்களைப் பாதுகாக்கும் வகையில் உங்களின் வாக்கு அமையட்டும்! தமிழ்நாடு வாக்களிக்கும்; தமிழ்நாடு வெல்லும்”.

கீழ்ப்பாக்கத்தில் தனது வாக்கை செலுத்தினார் நடிகர் விஜய் சேதுபதி

என்னுடைய வேண்டுகோள் என்ன என்றால் யார் ஆட்சிக்கு வந்தாலும், டாஸ்மாக் கடைகளை உடனே மூட வேண்டும். குடிமக்களை குடிகார மக்கள் ஆகியது போதும். தன் குடும்பத்துடன் கோடி கோடியாக சொத்துக்களை குவிக்காமல், கடைக்கோடி மனிதனின் வாழ்க்கையில் ஒளி ஏற்ற வேண்டும்.

நான் எனது ஜனநாயக கடமையை செய்துவிட்டேன். எல்லோரும் ஜனநாயக கடமையை செய்ய வேண்டும் என விரும்புகிறேன். அதற்கு மேல் எதுவும் சொல்லக்கூடாது இது ரகசிய வாக்கெடுப்பு. ஆனால் என்னை பற்றி எல்லோருக்கும் தெரியும் என்பதால் அது ரகசியம் இல்லை.

தவெக பொதுச் செயலாளரும் சென்னை தி.நகர் வேட்பாளருமான என்.ஆனந்த், தனது ஜனநாயகக் கடமையை ஆற்றினார். பின்னர், பேசிய அவர், ”வெற்றி நிச்சயம்; தமிழக வெற்றிக் கழகத்தின் தலைவர் தளபதிதான் நிச்சயம் முதல்வராக வருவார். எந்த சந்தேகமும் இல்லை. எல்லோரும் மாற்றத்தை எதிர்பார்த்துக் கொண்டிருக்கின்றனர். அந்த மாற்றத்தை தலைவர் தளபதிக்கு தர இருக்கிறார்கள்” என்றார்.

காலையில் முதல் நபராக வந்து வாக்களித்தார் அஜித். இந்நிலையில் அவர் வாக்களித்துவிட்டு செல்லும் போது செய்தியாளர்கள் மாற்றம் வருமா? எனக் கேட்டதாகவும், அதற்கு அஜித் NO NEED எனக் கூறியதாகவும் தகவல் பரவியது. தற்போது இது குறித்து அஜித்தின் மேலாளர் சுரேஷ் சந்திரா "மாற்றம் தேவையில்லை என நடிகர் அஜித் கூறவில்லை, NO NEED என அஜித் கூறியதாக பரவிய தகவல் தவறானது. தவறான தகவலை பரப்பி வருகிறார்கள் என நடிகர் அஜித்தின் மேலாளர் சுரேஷ் சந்திரா பதிலளித்துள்ளார்.

அணைக்கட்டு தொகுதியில் வாக்களித்த இயக்குநர் ஹெச்.வினோத்.

ஜனநாயக கடமையை நிறைவேற்றி இருக்கிறேன் என்பதில் மகிழ்ச்சி. இப்போது உடனடியாக மதுரைக்கு கிளம்புகிறேன். ஒரு வேட்பாளராக என்னுடைய தொகுதி மக்களை சந்திக்கிறேன். பிரச்சாரத்தின் போது உண்மையை சொன்னேன். மதுரை மத்திய தொகுதியை பார்த்தாலே அங்கிருக்கும் பிரச்சனைகள் நமக்கு தெரியும். அதைத்தான் நான் சொன்னேன், அரசாங்கம் செய்ய தவறியதை, செய்ய வேண்டியதை சொன்னேன். அதில் உண்மை இருந்ததால் மக்களுக்கு என் கருத்து போய் சேர்ந்திருக்கிறது.

கோவை கவுண்டம்பாளையத்தில் தமிழக பாஜக முன்னாள் தலைவர் அண்ணாமலை வாக்கு செலுத்தினார். பின்னர் செய்தியாளர்களிடம் பேசிய அவர், ”தமிழகத்தில் அனைவரும் காலைமுதலே ஜனநாயகக் கடமையை ஆற்றிக் கொண்டிருக்கின்றனர். வாக்குச் சாவடிகளில் நமது தமிழ்ச் சொந்தங்கள் அனைவரும் வரிசையில் நின்றுகொண்டிருக்கின்றனர். எல்லோரும் தவறாமல் வாக்களிக்க வேண்டும். மதியம் வெயில் அதிகமாக இருந்தாலும்கூட பெரியவர்கள் குடையுடன் வந்து வாக்கு செலுத்துங்கள். வாக்குச்சாவடிகளில் அனைத்து வசதிகளும் செய்யப்பட்டுள்ளன. ஆகையால் யாரும் வாக்களிக்காமல் இருந்துவிடாதீர்கள். நமது ஜனநாயகக் கடமையைச் செய்ய வேண்டும். தமிழகத்தில் நிச்சயம் ஒரு நல்ல மாற்றம் வரும் என்று நான் முழுமையாக நம்புகிறேன்” என்றார்.

ஆழ்வார்பேட்டையில் தனது வாக்கை பதிவு செய்தார் நடிகர் தனுஷ்

"தமிழ்நாடு தற்போது தலைவிரித்தாடும் ஊழல் மற்றும் வன்முறையால் பாதிக்கப்பட்டுள்ளது. ஒரு காலத்தில் முனிவர்கள் வாழ்ந்த பூமியாகத் திகழ்ந்த இது, இப்போது ஒரு கலாசார அடையாள நெருக்கடியைச் சந்தித்து வருகிறது. வளர்ச்சியையும் கலாசார முன்னேற்றத்தையும் ஒருங்கே உறுதி செய்யும் ஓர் அரசாங்கத்தைத் தமிழ்நாட்டு மக்கள் தேர்ந்தெடுப்பார்கள் என்பதில் நான் உறுதியாக உள்ளேன். உங்கள் வாக்கைச் செலுத்துங்கள்; மற்றவர்களும் அவ்வாறே செய்யுமாறு ஊக்கப்படுத்துங்கள்".

பெசன்ட் நகரில் வாக்களித்த நடிகர் விக்ரம்.

TVK தலைவர் விஜய், வாக்குப்பதிவு நேரத்தை இரண்டு மணி நேரம் நீட்டிக்கக் கோரி தேர்தல் ஆணையத்திற்கு கடிதம் எழுதியுள்ளார். போதிய எண்ணிக்கையில் பேருந்துகள் இயக்கப்படாததால், வாக்காளர்களால் தங்கள் வாக்குச்சாவடிகளுக்குச் செல்ல இயலவில்லை என்று குற்றம்சாட்டியுள்ள அவர், மாநிலப் போக்குவரத்துக் கழகங்களின் திட்டமிடல் குறைபாடுடையதாக உள்ளதாகவும் குறிப்பிட்டுள்ளார்.

தமிழ்நாட்டில் காலை 9 மணி நிலவரப்படி, 17.69% வாக்குகள் பதிவாகியுள்ளன.

திருச்சியில் உள்ள தில்லைநகர் வி.வி.பேட் இயந்திரம் பழுதானதால் அமைச்சர் கே.என்.நேரு வாக்களிக்காமல் காத்திருந்தார். 45 நிமிடத்திற்குப் பிறகு அவர் ஜனநாயகக் கடமையை நிறைவேற்றினார். வாக்கு செலுத்தியபின் பேட்டியளித்த அவர், “தேர்தலில் ஒரு சவாலும் இல்லை. எப்போதும்போல்தான் இருக்கிறது. அனைத்தும் சரியாகத்தான் இருக்கிறது. மக்களுடைய ஆதரவு தளபதிக்கு இருக்கிறது. நிச்சயம் வெற்றிபெறுவோம் என்ற நம்பிக்கை உள்ளது. வாக்குப் பதிவு இயந்திரத்தில் தவறாக வருகிறது எனச் சொன்னதையடுத்து சுத்தமாக மாற்றிவிட்டு புது இயந்திரம் மாற்றியுள்ளனர்” என்றார்.

இயக்குநர் பா.இரஞ்சித் தனது ஊரான கரலப்பாக்கத்தில் வாக்கு செலுத்தினார்.

சென்னை எஸ்.ஐ.இ.டி. கல்லூரியில் தமிழக முதல்வரும் சென்னை கொளத்தூர் தொகுதி வேட்பாளருமான மு.க.ஸ்டாலின் தனது மனைவி மற்றும் மகனுடன் வாக்கு செலுத்தினார்.

ஆழ்வார்பேட்டையில் தனது வாக்கை பதிவு செய்த இயக்குநர் அட்லீ

என்னுடைய ஜனநாயக கடமையை நான் செய்துவிட்டு வந்திருக்கிறேன். மற்றவர்களும் அதை செய்ய வேண்டும் என நம்புகிறேன். மாற்றம் வந்து கொண்டே இருக்கும். உங்கள் வாழ்க்கை மாறும்.

நடிகர் ரஜினிகாந்த் ஸ்டெல்லா மேரிஸ் கல்லூரியில் வாக்களித்தார். வாக்களித்துவிட்டு செல்லும் போது செய்தியாளர்களை சந்தித்த ரஜினி `ஓட்டுரிமை இருக்கும் எல்லோரும் ஓட்டு போடணும்' என்று கூறினார்.

மதுரை அண்ணாநகரில் வாக்களித்த இயக்குநர் அமீர்.

தேனாம்பேட்டையில் மகள் ஸ்ருதிஹாசனுடன் வந்து வாக்களித்தார் நடிகரும், மக்கள் நீதி மய்ய தலைவருமான கமல்ஹாசன்.

நடிகரும் இயக்குநருமான சசிக்குமார் புதுத்தாமரைபட்டியில் வாக்கை பதிவு செய்தார்.

நடிகரும் இயக்குநருமான ஆர் ஜே பாலாஜி கோட்டூர்புரத்தில் வாக்களித்தார்.

மதுரை மத்திய தொகுதி வேட்பாளர் சுந்தர் சி தனது மனைவி குஷ்பூ மற்றும் மகளுடன் மந்தைவெளியில் வாக்களித்துள்ளார்.

நடிகர் ஜெய் அடையாறு வாக்குச்சாவடியில் தனது வாக்கை பதிவு செய்தார்.