திருவண்ணாமலையில் கார்த்திகை மகா தீபம் வருகிற 3-ஆம் தேதி ஏற்றப்பட உள்ளது. இதற்காக திருவண்ணாமலை கோவிலில் கொடியேற்றப்பட்டு பல்வேறு நிகழ்ச்சிகள், பூஜைகள் தினமும் நடந்து வருகின்றன. இந்நிலையில், கார்த்திகை மகா தீபத்தையொட்டி திருவண்ணாமலை மாவட்ட காவல்துறை பல்வேறு பாதுகாப்பு முன்னெச்சரிக்கை நடவடிக்கைகளை மேற்கொண்டுள்ளது.
அதன்படி, திருவண்ணாமலை மகாதீபத்தை முன்னிட்டு வெளி மாவட்டங்களில் இருந்து வழக்கமாக திருவண்ணாமலை வழியாக வேறு மாவட்டங்களுக்கு செல்லக்கூடிய கனரக வாகனங்கள் (HMV லாரி உள்ளிட்ட சரக்கு வாகனங்கள்), இலகுரக வாகனங்கள் (LMV - கார், வேன் உள்ளிட்ட வாகனங்கள்) 02.12.2025 காலை 8 மணி முதல் 05.12.2025 காலை 6 மணி வரை திருவண்ணாமலை வழியாக வந்து செல்ல தடை செய்யப்பட்டுள்ளதுடன், மாற்றுப்பாதைகளில் செல்வதற்காக திருவண்ணாமலை மாவட்ட காவல்துறை ஏற்பாடு செய்துள்ளது.
அதே போல, 02.12.2025 முதல் 05.12.2025 வரை போக்குவரத்து நெரிசல் ஏதுமின்றி பக்தர்கள் வந்து செல்ல 24 தற்காலிக பேருந்து நிலையங்கள் ஏற்பாடு செய்யப்பட்டுள்ளதாக காவல்துறை அறிவித்துள்ளது. தற்காலிக பேருந்து நிலையங்கள் தொடர்பாக திருவண்ணாமலை மாவட்ட காவல்துறை WhatsApp உதவி எண். 9487851015-க்கு Hello Message மூலம் தொடர்புகொண்டு Google Map Link-ஐ பெற்று Google Map உதவியுடன் அந்தந்த தற்காலிக பேருந்து நிலையத்திற்கு செல்லலாம் திருவண்ணாமலை மாவட்ட காவல்துறை தெரிவித்துள்ளது.
திருவண்ணாமலை கார்த்திகை மகாதீபத்தை முன்னிட்டு 02.12.2025 முதல் 05.12.2025 வரை, பக்தர்கள் வந்துசெல்ல ஏதுவாக 130 கார் நிறுத்தும் இடங்களும், 33 இருசக்கர வாகன நிறுத்துமிடங்களும் தேவையான வசதிகளுடன் ஏற்பாடுகள் செய்யப்பட்டுள்ளது. கோவிலுக்கு வரும் பக்தர்கள் கார்களை பார்க்கிங் செய்ய எங்கே நிறுத்தலாம் என்பதனை வாட்ஸ்அப் மூலம் தொடர்பு கொள்ளலாம் என்று திருவண்ணாமலை மாவட்ட காவல்துறை தெரிவித்துள்ளது.
இந்நிலையில், பக்தர்கள் அவற்றை முறையாக பயன்படுத்திக்கொள்ளுமாறு திருவண்ணாமலை மாவட்ட காவல்துறை கேட்டுக் கொண்டுள்ளது. கார் நிறுத்தும் இடங்கள் தொடர்பாக காவல் துறையின் WhatsApp எண் 9487851015-க்கு Message மூலம் தொடர்பு கொள்ளலாம் என்றும் காவல்துறை அறிவித்துள்ளது.
கிரிவலப்பாதைக்கு செல்லும் பக்தர்களுக்கு 23 வழிகாட்டு நெறிமுறைகளையும் காவல்துறை அறிவித்துள்ளது. அதன்படி, பக்தர்களை ஆசிர்வதித்தல் போர்வையில் ஏமாற்றுபவர்களை பிடிக்க கிரிவலப்பாதையில் அதிவிரைவுப் படைகள் ரோந்துப் பணியில் ஈடுபடுவார்கள் என்றும், சந்தேகத்திற்கிடமான நபர்களையோ அல்லது பொருட்களையோ கண்டால் உடனடியாக அருகில் உள்ள காவல்துறை உதவி மையத்தில் தெரிவிக்கலாம் உள்ளிட்ட 23 வழிகாட்டு நெறிமுறைகளை அறிவிக்கப்பட்டிருக்கின்றன. மேலும், திருவண்ணாமலை மகா தீபம் தரிசிக்க வரும் பக்தர்கள் உதவிக்காக காவல் உதவி மையம் 24 மணி நேரமும் செயல்படும் என்று திருவண்ணாமலை மாவட்ட காவல்துறை அறிவித்துள்ளது.
இந்நிலையில், டிசம்பர்-3 ஆம் தேதி திருவண்ணாமலை மாவட்டத்திற்கு உள்ளூர் விடுமுறை அறிவிக்கப்பட்டிருக்கிறது.