வங்கக்கடலில் உருவான காற்றழுத்த தாழ்வு பகுதியானது, ஆழ்ந்த காற்றழுத்த தாழ்வு மண்டலமாக மாறி பிறகு ஃபெஞ்சல் புயலாக உருமாறியது. புயலைத்தொடர்ந்து தமிழகத்தில் உள்ள சென்னை, திருவள்ளூர் முதலிய பல்வேறு மாவட்டங்களில் கனமழை எச்சரிக்கை விடுக்கப்பட்டன.
முதலில் புயலானது இன்று பிற்பகல் காரைக்கால் - மாமல்லபுரம் இடையே கரையை கடக்கும் என கூறப்பட்டிருந்த நிலையில், புயலின் வேகம் குறைந்ததால் இன்று மாலை கரையை கடக்கும் என கூறப்பட்டது.
இந்நிலையில் இன்று மாலை 5.30 மணியளவில் இருந்து புயலின் முன்பகுதி கரையை கடந்துவருவதாக தெரிவிக்கப்பட்டது.
மாலை நிலவரப்படி 4 மணிநேரத்தில் புயல் கரையை கடந்துவிடும் என கூறப்பட்ட நிலையில், தற்போது ஃபெஞ்சல் புயலானது இன்னும் 2 மணிநேரத்தில் முழுவதுமாக கரையை கடக்கும் எனவும், 10 கிமீ வேகத்தில் கரையை கடந்துவருவதாகவும் சென்னை வானிலை ஆய்வு மையம் தகவல் தெரிவித்துள்ளது.