டிட்வா புயலின் வேகம் மணிக்கு 12 கிமீ வேகத்தில் இருந்து 7 கிமீ வேகமாகக் குறைந்தது. புயலின் மையப்பகுதி வடதமிழகம், புதுச்சேரி கடற்கரைகளுக்கு 80கிமீ தொலைவில் அமைந்துள்ளதது. வடக்கு வடமேற்கு நோக்கி நகரும் டிட்வா புயல் தமிழக கடற்கரையை 25 கிமீ வரை நெருங்கும் என்றும் வானிலை ஆய்வு மையம் தெரிவித்திருக்கிறது.
டிட்வா புயல் பாதிப்பால் உயிரிழந்தோரின் குடும்பங்களுக்கு உடனடி நிவாரணம், கால்நடை இழப்புகளுக்கான நஷ்டஈடு, குடிசை வீடு சேதங்களுக்கான அவசர உதவி அனைத்தும் தாமதமின்றி வழங்கப்பட வேண்டும்-காங்கிரஸ் தலைவர் செல்வப்பெருந்தகை வலியுறுத்தியிருக்கிறார்.
தமிழ்நாடு காங்கிரஸ் கமிட்டியின் தலைவர் செல்வப்பெருந்தகை வெளியிட்டுள்ள அறிக்கையில் கூறியிருப்பதாவது:- டிட்வா புயல் தாக்கத்தில் இதுவரை 3 பேர் உயிரிழந்துள்ள செய்தி மனதை மிகுந்த துயரத்தில் ஆழ்த்துகிறது. இத்துடன், 149 கால்நடைகள் உயிரிழந்ததும், 234 குடிசைகள் மற்றும் வீடுகள் சேதமடைந்ததும் இந்த புயல் மக்களின் வாழ்வாதாரத்தையும் அடிப்படை பாதுகாப்பையும் தீவிரமாக பாதித்துள்ளது என்பதை வெளிப்படுத்துகிறது. உயிரிழந்தோரின் குடும்பங்களுக்கு உடனடி நிவாரணம், கால்நடை இழப்புகளுக்கான நஷ்டஈடு, குடிசை வீடு சேதங்களுக்கான அவசர உதவி அனைத்தும் தாமதமின்றி வழங்கப்பட வேண்டும். விவசாயிகளின் கால்நடை வாழ்வாதாரம் பாதிக்கப்பட்டுள்ள பகுதிகளில் சிறப்பு முகாம்கள் அமைக்கப்பட வேண்டியது அவசியம். மீட்பு நிவாரண பணிகள் இன்னும் வேகமாக முன்னெடுக்கப்பட வேண்டும்.
அதிகாரிகள் வெளியிடும் ஒவ்வொரு அறிவுறுத்தலையும் கவனமாக பின்பற்றுவது, உயிர்களையும் சொத்துகளையும் காக்கும் மிக முக்கியமான நடவடிக்கை. மக்கள் அனைவரும் அத்தியாவசிய முன்னெச்சரிக்கைகளை பின்பற்றி பாதுகாப்பாக இருக்கும்படி கேட்டுக் கொள்கிறேன். இந்த பேரிடர் நேரத்தில் நாம் அனைவரும் ஒன்றுபட்டு, நமது மக்களை காக்க வேண்டியது காலத்தின் கட்டாயம்" என தெரிவித்துள்ளார்.
டிட்வா புயல் காரணமாக திருவள்ளூர் மாவட்டம் முழுவதும் கனமழை எச்சரிக்கையை வானிலை ஆய்வு மையம் அறிவித்திருந்த நிலையில் மிதமான மழையும் மற்றும் தொடர்ச்சியாக காற்றும் வீசி வருகிறது.
இந்நிலையில் திருத்தணி அருள்மிகு சுப்பிரமணியசாமி திருக்கோயிலில், கனமழைக்கான எச்சரிக்கை இருந்த நிலையிலும்கூட பக்தர்கள் சாமி தரிசனத்திற்கும், சுப முகூர்த்த தினத்தில் திருமணம் செய்யவும் கர்நாடகம் மற்றும் ஆந்திர மாநிலங்களில் இருந்து மலைக்கோவிலில் குவிந்தனர்.
பக்தர்கள் தொடர்ந்து சாமி தரிசனத்திற்கு வந்து கொண்டிருப்பதால் இரண்டு மணி நேரத்திற்கு மேலாக வரிசையில் சென்று பக்தர்கள் தரிசனம் மேற்கொண்டு வருகின்றனர். அதிக அளவில் பக்தர்கள் வருகை தந்ததால் மலைக்கோவிலில் போக்குவரத்து இடையூறு ஏற்பட்டது.
திருவள்ளூர், ராணிப்பேட்டை என இரண்டு மாவட்டங்களுக்கு இன்று ரெட் அலர்ட் விடுத்துள்ளது வானிலை ஆய்வு மையம். சென்னை, காஞ்சிபுரம், செங்கல்பட்டு, வேலூர் போன்ற மாவட்டங்களில் மிக கனமழை பெய்யும் என்றும் ஆரஞ்சு அலர்ட்டும் விடுக்கப்பட்டுள்ளது. திருப்பத்தூர், திருவண்ணாமலை, விழுப்புரத்தில் இன்று கனமழை பெய்யும் என்றும் வானிலை ஆய்வு மையம் தெரிவித்திருக்கிறது.
'டிட்வா புயல்' காரணமாக காரைக்கால் மாவட்டத்தில் தொடந்து இரண்டு நாட்களாக நகரப்பகுதி மற்றும் கிராமப்புற பகுதிகளில் தொடர் கனமழை பெய்து வருகிறது.
இந்த நிலையில் தொடர் கனமழை காரணமாக திருநள்ளாறு, நெடுங்காடு, கோட்டுச்சேரி உள்ளிட்ட பல்வேறு பகுதிகளில் 4500 ஹெக்டர் பரப்பளவில் நெல் பயிர்கள் நீரில் முழுகி சேதமடைந்ததால் காரைக்கால் மாவட்ட விவசாயிகள் மிகுந்த வேதனையில் இருந்து வருகிறார்கள்.
மேலும் பாசன வாய்க்கால் மற்றும் வடிகால் வாய்க்காலை அதிகாரிகள் முறையாக தூர்வாராத காரணத்தினால் மழைநீர் விவசாய நிலத்தில் தேங்கி நிற்பதாக விவசாயிகள் தெரிவித்துள்ளனர். எனவே விவசாய நிலத்தில் தேங்கியுள்ள மழை நீரை உடனடியாக வெளியேற்றவும் மழையால் பாதித்த பயிர்களுக்கு அதிகாரிகள் ஆய்வு செய்து நிவாரணம் வழங்க வேண்டும் என்று விவசாயிகள் புதுச்சேரி அரசு மற்றும் மாவட்ட நிர்வாகத்திற்கு கோரிக்கை வைத்துள்ளனர்.
வங்க கடலில் உருவான டிட்வா புயல் காரணமாக நாகப்பட்டினம் திருவாரூர் புதுக்கோட்டை தஞ்சாவூர் ஆகிய மாவட்டங்களில் அதிக கனமழை பெய்யும் என சென்னை வானிலை ஆய்வு மையம் அறிவித்திருந்தது. இந்த மாவட்டங்களுக்கு ரெட் அலர்ட் என்பது விடுக்கப்பட்டுள்ளது. இந்த நிலையில் திருவாரூர் மாவட்டத்தில் நேற்று முதல் தற்போது வரை மிதமான மழை பெய்து வருகிறது.
கடந்த மூன்று நாட்களுக்கு முன்பு மாவட்டத்தின் பல்வேறு இடங்களில் பெய்த கனமழையின் காரணமாக தாளடி நெற்பயிகளில் மழைநீர் சூழ்ந்திருந்தது. நேற்று இரவு முதல் தற்போது வரை பெய்து வரும் மழை காரணமாக மாவட்டத்தின் பல்வேறு இடங்களில் சுமார் 1000 ஏக்கர் நெற்பயிர்கள் மழைநீரில் மூழ்கி உள்ளது. குறிப்பாக பல்லவராயன் கட்டளை, புழுதிக்குடி, விக்கிரபாண்டியம், கோட்டூர் உள்ளிட்ட பகுதிகளில் தொடர்ந்து மழை பெய்து வரும் காரணத்தினால் ஆயிரக்கணக்கான ஏக்கர் தாளடி நெல் பயிர்கள் மழை நீரில் மூழ்கியுள்ளன.
ஒரு ஏக்கருக்கு 8,000 செலவு செய்துள்ள நிலையில் தொடர்ந்து பெய்து வரும் மழையின் காரணமாக பயிர்கள் அழுகி வருவதால் விவசாயிகள் மிகப்பெரிய வேதனை அடைந்துள்ளனர்.
மேலும் கிளை வாய்க்கால்கள் தூர்வாராமல் இருப்பதால் மழை நீர் வடியமுடியாமல் உள்ளது. எனவே கிளை வாய்க்கால்களை போர்க்கால அடிப்படையில் தூர் வார வேண்டும் என விவசாயிகள் கோரிக்கை விடுத்துள்ளனர்.
அ.ம.மு.க. பொதுச்செயலாளர் டி.டி.வி. தினகரன் டிட்வா புயலின் தாக்கம் தொடர்பாக அறிக்கை ஒன்றை வெளியிட்டிருக்கிறார்.
அதில், "டிட்வா புயலின் காரணமாகக் காவிரி டெல்டா மாவட்டங்களான தஞ்சாவூர், திருவாரூர், நாகப்பட்டினம், மயிலாடுதுறை, கடலூர் ஆகிய பகுதிகளில் பெய்துவரும் தொடர் மழையால் பல லட்சம் ஏக்கர் பரப்பளவில் பயிரிடப்பட்டிருந்த நெற்பயிர் சாகுபாடி முழுமையாக மழைநீரில் மூழ்கி சேதமடைந்துள்ளன. வடகிழக்கு பருவமழையின் தொடக்கக் காலத்தில் பெய்த கனமழையால் பாதிக்கப்பட்ட பயிர்களுக்கு இன்றுவரை இழப்பீடு வழங்கப்படாத நிலையில், தற்போது டிட்வா புயலின் தாக்கத்தினால் வயல் வெளியில் குளம்போல தேங்கியிருக்கும் மழைநீரும், அதில் மூழ்கியிருக்கும் நெற்பயிர்களும் காவிரி டெல்டா விவசாயிகள் மீளவே முடியாத அளவிற்குப் பேரிடியாக அமைந்துள்ளது.
டிட்வா புயலின் தாக்கத்தினால் வழக்கத்திற்கு மாறாகப் பெருமழை பொழிந்து வரும் நிலையில், நாளையுடன் நிறைவடைய இருக்கும் பயிர்க்காப்பீடு செய்வதற்கான கால அவகாசத்தை மேலும் நீட்டிக்க வேண்டும் என்ற கோரிக்கையும் அனைத்து தரப்பு விவசாயிகளின் மத்தியிலும் எழத்தொடங்கியுள்ளது. எனவே, காவிரி டெல்டா பகுதிகளில் பெய்துவரும் கனமழையால் பாதிக்கப்பட்டுள்ள நெற்பயிர்களை உடனடியாக கணக்கீடு செய்து அதற்கான உரிய இழப்பீட்டை உடனடியாக வழங்குவதோடு, மத்திய அரசுக்கு உரிய அழுத்தம் கொடுத்து நாளையுடன் நிறைவடையும் இருக்கும் கால அவகாசத்தை மேலும் நீட்டிப்பதற்கான நடவடிக்கைகளையும் மேற்கொள்ள வேண்டும் என தமிழக அரசை வலியுறுத்துகிறேன்" என தெரிவித்துள்ளார்.
டிட்வா புயல் காரணமாக விழுப்புரம் மாவட்டத்தில் கடந்த இரண்டு நாட்களாக விட்டுவிட்டு மிதமான மழை பெய்து வருகிறது. விழுப்புரம் மாவட்டம் மரக்காணம், அனுமந்தை, எக்கியார்குப்பம், வசவன்குப்பம், கைப்பணி குப்பம் உள்ளிட்ட 19 மீனவர்கள் வசிக்கும் பகுதியில் கடல் சீற்றத்துடன் காணப்படுகிறது. கடல் பகுதியில் ஆறு அடிக்கு மேல் அலை எழும்புகிறது. கனமழை புயல் எச்சரிக்கை காரணமாக 19 மீனவ கிராமங்களைச் சேர்ந்த இரண்டாயிரத்திற்கும் அதிகமான படகுகள் வலைகளுடன் கரை பகுதியிலுள்ள சாலையில் நிறுத்தப்பட்டுள்ளன. பத்தாவது நாளாக மீனவர்கள் கடலுக்கு செல்லவில்லை என்பதால் தொழிலின்றி மீனவர்கள் பாதிப்படைந்துள்ளனர்.
எக்கியார்குப்பம் பகுதியில் ஒவ்வொரு புயலின் போதும் மீனவர்களின் வாழ்வாதாரம் பாதிக்கப்படுவதாகவும், மழையின் போதும் படகு மற்றும் வலைகளை பாதுகாக்க சிரமம் ஏற்படுவதால் மரக்காணம் பகுதியில் தூண்டில் வளைவு அல்லது துறைமுகம் அமைக்க வேண்டுமென பலமுறை கோரிக்கை வைத்தும் நடவடிக்கை எடுக்கவில்லை என வேதனை தெரிவிக்கின்றனர். மேலும் மழை, புயல் காலங்களில் உரிய நிவாரணம் வழங்க வேண்டும் என கோரிக்கை வைத்துள்ளனர்.
மயிலாடுதுறை மாவட்டத்தில் பெய்த கனமழையால் சுமார் 21,775 ஏக்கர் பயிர்கள் மழை நீரில் மூழ்கியுள்ளன. தலச்சங்காடு, ராதாநல்லூர், கீழப்பெரும்பள்ளம் உள்ளிட்ட பல கிராமங்களில் சுமார் 3,000 ஏக்கர் சம்பா பயிர்கள் அழுகிப் பாதிக்கப்பட்டுள்ளன. ஏக்கருக்கு 30,000 ரூபாய் வரை செலவு செய்துள்ள நிலையில், பயிர்கள் மூழ்கியதால் விவசாயிகள் வேதனை அடைந்துள்ளனர்.பிரதான வடிகால் வாய்க்கால்கள் தூர்வாரப்பட்டாலும், விளைநிலங்களை ஒட்டியுள்ள சிறிய வடிகால் வாய்க்கால்கள் தூர்வாரப்படாததே தண்ணீர் வடியாததற்கு முக்கிய காரணம் என விவசாயிகள் குற்றம் சாட்டுகின்றனர்.
சென்னைக்கு தெற்கே 180 கி.மீ. தொலைவில் டிட்வா புயல் மையம் கொண்டிருப்பதாக வானிலை ஆய்வு மையம் தெரிவித்திருக்கிறது. மணிக்கு 12 கிலோமீட்டர் வேகத்தில் நகர்ந்து வருவதாகவும் வானிலை ஆய்வு மையம் தகவல் தெரிவித்திருக்கிறது. வட தமிழக கடற்கரையில் 30 கிலோ மீட்டர் வரை அருகில் வரும் டிட்வா புயல் இன்று மாலை ஆழ்ந்த காற்றழுத்த தாழ்வு மண்டலமாக வலுவிழக்கும் என்றும் தெரிவிக்கப்பட்டுள்ளது. சென்னையைப் பொறுத்தவரை விட்டுவிட்டு மழை பெய்யும் என்றும் அவ்வப்போது தரைக்காற்றும் வீசும் என்றும் தெரிவிக்கப்பட்டுள்ளது.