கவுதம் காம்பீர் போட்டியிடும் தொகுதியை அறிவித்தது பாஜக

கிரிக்கெட் வீரர் கவுதம் காம்பீர் மக்களவைத் தேர்தலில் பாஜக சார்பில் கிழக்கு டெல்லி தொகுதியில் போட்டியிடுகிறார். 

மக்களவைத் தேர்தல் ஒவ்வொரு கட்டங்களாக இந்தியாவில் நடைபெற்று வருகிறது. இந்நிலையில் டெல்லியில் மக்களவைத் தேர்தலுக்கான அரசியல் களம் சூடு பிடித்துள்ளது. ஒவ்வொரு கட்சிகளும் தங்கள் வேட்பாளர்களை அறிவித்து வருகின்றனர். அந்த வகையில் கிழக்கு டெல்லி மற்றும் புது டெல்லி ஆகிய மக்களவைத் தொகுதிகளுக்கான வேட்பாளர்களை பாஜக அறிவித்துள்ளது. இதில் கிழக்கு டெல்லியில் முன்னாள் கிரிக்கெட் வீரர் கவுதம் காம்பீரும், புது டெல்லியில் பாஜக மினாக்‌ஷி லேகியும் போட்டியிடுகின்றனர். ராஃபேல் விவகாரத்தில் ராகுல் காந்தி பொய் பரப்பி வருவதாக வழக்கு தொடர்ந்தவர் மீனாக்‌ஷி லேகி என்பது குறிப்பிடத்தக்கது.

இதற்கிடையே டெல்லி மாநிலத்தின் மக்களவைத் தொகுதிகளுக்கான வேட்பாளர்களை இன்று காங்கிரஸ் அறிவித்தது. அதன்படி, புது டெல்லி தொகுதியில் முன்னாள் அமைச்சர் அஜய் மாக்கென் போட்டியிடுகிறார். வட கிழக்கு டெல்லியில் முன்னாள் முதல்வர் ஷீலா தீக்ஷித் களமிறங்க உள்ளார். சாந்தினி சவுக் தொகுதியில் போட்டியிடப் போவதாக முன்னாள் மத்திய அமைச்சரும், பிரபல வழக்கறிஞருமான கபில் சிபல் தெரிவித்திருந்த நிலையில் அத்தொகுதி ஜெ.பி.அகர்வால் என்பவருக்கு ஒதுக்கப்பட்டுள்ளது.