தமிழகத்தில் நாளை முதல் 27 மாவட்டங்களில் 9,333 பேருந்துகள் இயக்கப்படும் என போக்குவரத்துறை அறிவித்துள்ளது. பயணிகளின் வருகைக்கு ஏற்ப கூடுதல் பேருந்துகளை இயக்க ஏற்பாடுகள் செய்யப்படும் என்று அமைச்சர் ராஜகண்ணப்பன் தெரிவித்துள்ளார்.
தமிழ்நாடு முழுவதும் உள்ள 38 மாவட்டங்கள் 3 வகையாக பிரிக்கப்பட்டு, கொரோனா பொதுமுடக்கத்திலிருந்து தளர்வுகள் அளிக்கப்பட்டுள்ளன. அதில் வகை 2-ல் உள்ள கடலூர், தருமபுரி, கன்னியாகுமரி, சிவகங்கை, ராணிப்பேட்டை, வேலூர் உள்ளிட்ட 23 மாவட்டங்களில் திங்கள்கிழமை முதல் பொதுப் போக்குவரத்தை தொடங்குவதற்கு முதலமைச்சர் மு.க.ஸ்டாலின் ஏற்கனவே உத்தரவிட்டுள்ளார்.
இதுதவிர வகை 3-ல் உள்ள சென்னை, செங்கல்பட்டு, காஞ்சிபுரம், திருவள்ளூர் மாவட்டங்களில் ஏற்கனவே நகரப்பேருந்துகள் இயக்கப்பட்டு வருகின்றன. இந்நிலையில் 27 மாவட்டங்களில் வரும் திங்கள்கிழமை காலை 6 மணி முதல் அரசு விரைவுப் போக்குவரத்து கழக பேருந்துகள் மற்றும் சார்புடைய போக்குவரத்துக்கழக பேருந்துகள் இயக்கப்படும் என தமிழக அரசு அறிவித்துள்ளது. இதன் மூலம் 11 மாவட்டங்கள் தவிர்த்து, சென்னையிலிருந்து கன்னியாகுமரி வரை மாவட்டங்கள் இடையே பேருந்து சேவை கிடைக்கும்.