18வது சீசனாக 2025 ஐபிஎல் தொடர் தொடங்கி நடைபெற்றுவருகிறது. இதில் 5 கோப்பை வென்ற அணிகளான சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் 2 தோல்விகளை வரிசையாக சந்தித்து தடுமாறிவருகின்றன.
இந்த சூழலில் 2 தோல்விகளுக்கு பிறகு 3வது போட்டியில் மும்பை வான்கடே மைதானத்தில் கொல்கத்தா அணியை எதிர்த்து விளையாடியது மும்பை அணி. இதில் சிறப்பாக பந்துவீசிய மும்பை அணி 116 ரன்னில் கொல்கத்தாவை சுருட்டி 8 விக்கெட்டுகள் வித்தியாசத்தில் அபார வெற்றியை பதிவுசெய்தது. அறிமுக போட்டியில் விளையாடிய வேகப்பந்துவீச்சாளர் அஸ்வனி குமார் 3 ஓவர் மட்டுமே வீசி 4 விக்கெட்டுகளை கைப்பற்றி ஆட்டநாயகன் விருதை தட்டிச்சென்றார்.
மும்பை அணி முதல் வெற்றியை ருசித்தபோதும் மும்பை இந்தியன்ஸ் கேப்டன் ஹர்திக் பாண்டியாவை ரசிகர்கள் விமர்சித்து வருகின்றனர். என்ன காரணம் பார்க்கலாம்..
அறிமுக ஐபிஎல் போட்டியில் களமிறங்கி 4 விக்கெட்டுகளை வீழ்த்திய 23 வயதேயான மும்பை அணி வீரர் அஸ்வனி குமார், ஐபிஎல் கிரிக்கெட் வரலாற்றில் அறிமுக போட்டியில் 4 விக்கெட்டுகளை வீழ்த்திய முதல் இந்திய பவுலர் என்ற சாதனையை படைத்தார்.
IPL அறிமுக போட்டியில் சிறந்த பந்துவீச்சு:
1. அல்சாரி ஜோசப் (MI) - 6/12 vs SRH - 2019
2. ஆண்ட்ரூ டை (GL) - 5/17 vs RPS - 2017
3. ஷோயப் அக்தர் (KKR) - 4/11 vs DD - 2008
4. அஸ்வனி குமார் (MI) - 4/24 vs KKR - 2025*
5. கெவோன் கூப்பர் (RR) - 4/26 vs KXIP - 2012
6. டேவிட் வைஸ் (RCB) - 4/33 vs MI - 2015
மும்பை அணிக்காக களம்கண்ட 23 வயது இளம் வீரர் அஸ்வனி குமார் அறிமுக போட்டியில் 3 ஓவர்களில் 24 ரன்கள் விட்டுக்கொடுத்து 4 விக்கெட்டுகளை கைப்பற்றி அசத்தினார்.
இந்த சூழலில் 5 விக்கெட்டுகளை கைப்பற்ற மீதமொரு ஓவர் இருந்தபோதும் மும்பை கேப்டன் ஹர்திக் பாண்டியா அஸ்வனியின் ஸ்பெல்லை முடிக்க அனுமதிக்கவில்லை. ஹர்திக் பாண்டியாவின் இந்த செயலை கிரிக்கெட் ரசிகர்கள் விமர்சித்துவருகின்றனர்.
இதுவரை ஐபிஎல் கிரிக்கெட் வரலாற்றில் அறிமுக போட்டியில் ஒரு இந்திய பவுலர் கூட 5 விக்கெட் வீழ்த்தியதில்லை என்பதால், ஒருவேளை அஸ்வனி குமார் 5 விக்கெட் வீழ்த்தியிருந்தால் அது வரலாற்று சாதனையாகவும், இளம் வீரருக்கு ஒரு பெரிய உத்வேகமாகவும் அமைந்திருக்கும்.
சில ரசிகர்கள் அஸ்வனி குமாரை ஆடும் லெவனில் அனுமதித்ததற்கு ஹர்திக் பாண்டியாவை பாராட்டினாலும், அந்த ஒரு ஓவரை வீசவைத்திருக்கலாம் என்ற வருத்தத்தையும் பதிவுசெய்துவருகின்றனர்.